ذاکر حسین کالج آف انجینئرنگ اینڈ ٹکنالوجی نے ایم ٹی ایس نندا اسٹوڈنٹ انوویشن ایوارڈز 2026 میں پہلا مقام حاصل کیا
علی گڑھ، 19 مارچ (ہ س)۔ ذاکر حسین کالج آف انجینئرنگ اینڈ ٹکنالوجی، علی گڑھ مسلم یونیورسٹی (اے ایم یو) کے طلبہ نے پانچویں ایم ٹی ایس نندا اسٹوڈنٹ انّوویشن ایوارڈز 2026 میں پہلا مقام حاصل کرکے ادارے کا نام روشن کیا ہے۔ میرین ٹکنالوجی سوسائٹی (ایم ٹی ایس) انڈیا سیکشن کے زیر اہتمام چنئی میں واقع ایس آر ایم انسٹی ٹیوٹ آف سائنس اینڈ ٹکنالوجی میں منعقدہ ٹیک سرج 2026 کے دوران یہ ایوارڈ پیش کیا گیا۔ بی ٹیک (کمپیوٹر انجینئرنگ) کے پہلے سال کے طالب علم مسٹر عبداللہ احمد صدیقی نے ٹیم کی جانب سے یہ اعزاز حاصل کیا۔
اے ایم یو کی ٹیم میں عمار باری، محمد بلال، تنشکا بھاردواج، سپریت چودھری، دِوّیانشی گپتا اور عبداللہ احمد صدیقی شامل تھے۔ ٹیم کی رہنمائی شعبہ میکینیکل انجینئرنگ کے پروفیسر سلیم انور خان نے کی، جو ایم ٹی ایس اے یو وی–ذاکر حسین کالج آف انجینئرنگ اینڈ ٹکنالوجی اسٹوڈنٹ سیکشن کے کاؤنسلر بھی ہیں۔
اے ایم یو کی ٹیم کو یہ اعزاز ان کے اختراعی پروجیکٹ بعنوان ”فزکس انفارمڈ نیورل ریڈیئنس فیلڈ فار ٹربڈ واٹر انسپیکشن“ کے لئے دیا گیا۔ اس پروجیکٹ میں ایک جدید فریم ورک متعارف کرایا گیا ہے جو فزکس سے باخبر نیورل ریڈیئنس فیلڈ کو ایک خودکار زیرِ آب گاڑی (اے یو وی) کے ساتھ ملا کر کم مرئی حالات میں درست معائنہ ممکن بناتا ہے۔ روشنی کے بکھراؤ اور جذب جیسے مسائل کو مؤثر طریقے سے حل کرتے ہوئے یہ نظام زیر آب امیجنگ کو بہتر بناتا ہے اور اعلیٰ معیار کے تھری ڈی ری کنسٹرکشن اور ڈیجیٹل ٹوئن کی تخلیق کو انجینئرنگ مقاصد کے لیے ممکن بناتا ہے۔
ملک بھر کی 28 ٹیموں کے درمیان مقابلے میں اے ایم یو کی ٹیم نے اپنی جدت، تکنیکی مہارت اور عملی افادیت کی بنیاد پر نمایاں کامیابی حاصل کی جو میرین روبوٹکس، زیر آب ادراک اور ذہین نظام جیسے جدید شعبوں میں اے ایم یو کے طلبہ کی بڑھتی ہوئی مہارت کو ظاہر کرتی ہے۔
آنجہانی کے نندا کمار کی یاد میں قائم شدہ ایم ٹی ایس نندا اسٹوڈنٹ انوویشن ایوارڈ میرین اور اوشیئن ٹکنالوجی کے میدان میں جدت، اشتراک اور مسائل حل کرنے کی حوصلہ افزائی کرتا ہے۔
ہندوستھان سماچار
---------------
ہندوستان سماچار / سید کامران علی گڑھ
