ممبئی ، 19 مارچ (ہ س) ممبئی میں برطانوی دور سے کاروبار کرنے والے تقریباً 4,000 اسٹال ہولڈرز کو ہاکرز قرار دینے کے مجوزہ فیصلے پر سیاسی ردعمل سامنے آیا ہے، بی جے پی کے رکن اسمبلی سنجے کیلکر نے ان اسٹال ہولڈرز کو تحفظ فراہم کرنے کا مطالبہ کیا۔

سنجے کیلکر نے کہا کہ ممبئی میونسپل کارپوریشن کی حدود میں موجود یہ اسٹال ہولڈرز طویل عرصے سے تمام مقررہ فیس ادا کرتے ہوئے قانونی طور پر کاروبار کر رہے ہیں۔ تاہم بی ایم سی کی جانب سے انہیں ہاکرز قرار دینے کی تجویز پیش کی گئی ہے، جس کے ساتھ لائسنس کی منتقلی اور خرید و فروخت پر پابندی عائد کر دی گئی ہے۔

انہوں نے کہا کہ اس کاروبار سے ہزاروں خاندانوں کا گزر بسر وابستہ ہے اور بی ایم سی کے اس فیصلے کے باعث یہ خاندان معاشی بحران کا شکار ہو سکتے ہیں۔ انہوں نے اسمبلی میں یہ معاملہ اٹھاتے ہوئے توجہ دلائی کہ آدرش بی ایم سی اسٹال لائسنس ہولڈرز یونین گزشتہ 25 سالوں سے اپنے حقوق کے لیے جدوجہد کر رہی ہے۔

کیلکر کے مطابق اسٹال ہولڈرز کو پہلے بھی متعلقہ حکام کے سامنے دو بار نمائندگی کا موقع دیا گیا تھا، مگر ان کے تحفظ کے لیے کوئی حتمی فیصلہ اب تک نافذ نہیں کیا گیا۔ انہوں نے واضح کیا کہ اسٹال ہولڈرز اور ہاکرز کی الگ الگ تعریفیں ہیں، اور اسٹال ہولڈرز کو ہاکرز قرار دینے کا فیصلہ غیر مناسب ہے، جس سے ہزاروں خاندان متاثر ہو رہے ہیں۔ بی جے پی رکن اسمبلی نے مطالبہ کیا کہ ان اسٹال ہولڈرز سے مناسب فیس لے کر انہیں متعلقہ اسکیم کا فائدہ دیا جائے اور ان کے روزگار کو محفوظ بنایا جائے۔

ہندوستھان سماچار

--------------------

ہندوستان سماچار / جاوید این اے