حیدرآباد، 17 مارچ (ہ س)۔ حکام کے مطابق دکان میں بڑی مقدار میں کئی دنوں سے ذخیرہ کیا گیا پرانا اورغیر معیاری چکن فروخت کیا جا رہا تھا، جو عوامی صحت کے لیے شدید خطرہ بن سکتا تھا۔ چھاپے کے دوران پولیس اور فوڈ سیفٹی ٹیم نے تقریباً 800 کلو گرام چکن ضبط کر لیا، جسے بعد ازاں تلف کرنے کے اقدامات کیے گئے۔ تحقیقات میں یہ بات بھی سامنے آئی کہ مذکورہ چکن صرف عام صارفین کو ہی نہیں بلکہ شہر کے مختلف وائن شاپس، بارز اور ریستورانوں کو بھی سپلائی کیا جا رہا تھا۔ اس انکشاف کے بعد متعلقہ اداروں نے ان مقامات کی بھی جانچ شروع کر دی ہے جہاں یہ چکن فراہم کیا جا رہا تھا۔ مزید تفتیش کے دوران یہ معلوم ہوا کہ دکان کا لائسنس گزشتہ جنوری میں ہی ختم ہو چکا تھا، اس کے باوجود غیر قانونی طور پر کاروبار جاری رکھا گیا۔ اس سنگین خلاف ورزی پر پولیس نے سخت کارروائی کرتے ہوئے مقدمہ درج کر لیا۔پولیس نے دکان کے منتظم شکیل سمیت چند دیگرافراد کو حراست میں لے لیا ہے اور ان سے پوچھ گچھ جاری ہے۔ حکام کا کہنا ہے کہ اس معاملے میں ملوث دیگر افراد اور نیٹ ورک کا بھی پتہ لگایاجا رہا ہے۔عہدیداروں نے عوام کو خبردار کیا ہے کہ وہ صرف معیاری اور لائسنس یافتہ دکانوں سے ہی گوشت خریدیں اور کسی بھی مشتبہ سرگرمی کی اطلاع فوری طور پر متعلقہ حکام کو دیں، تاکہ عوامی صحت کا تحفظ یقینی بنایا جا سکے۔ ۔ ہندوستھان سماچار

ہندوستان سماچار / محمدعبدالخالق