ممبئی ، 15 مارچ (ہ س) شہر ممبئی کے دھاراوی علاقے میں پیش آنے والے ایک ہولناک واقعے میں ایک شخص نے اپنی بیوی کو قتل کر دیا اور بعد میں ویڈیو کال کے ذریعے اپنے بیٹے کو اس کی اطلاع دی۔ پولیس کے مطابق ملزم کو اپنی بیوی پر جادو ٹونے کا شبہ تھا اور اسی وجہ سے دونوں کے درمیان طویل عرصے سے تنازع جاری تھا۔
پولیس تحقیقات کے مطابق ملزم امرت میگھا سولنکی (58) دھاراوی کولیوڑا کے جامبا پاسکل چال میں اپنی بیوی سورجبین سولنکی (52) کے ساتھ رہائش پذیر تھا۔ 13 مارچ کی دوپہر تقریباً ڈھائی بجے دونوں کے درمیان جھگڑا ہوا جس کے بعد امرت سولنکی نے پہلے پانی کی بوتل سے بیوی کے سر پر حملہ کیا اور پھر اوڑھنی سے اس کا گلا گھونٹ دیا۔ اس حملے کے نتیجے میں سورجبین موقع پر ہی شدید زخمی ہو کر گر پڑیں اور بعد میں ان کی موت ہو گئی۔
واقعے کے بعد ملزم نے اپنے بیٹے شیورام سولنکی (33) کو واٹس ایپ ویڈیو کال کی۔ کال کے دوران وہ خون سے لت پت حالت میں نظر آیا اور اس نے کیمرہ گھما کر بیوی کی لاش دکھاتے ہوئے قتل کا اعتراف کیا۔ یہ منظر دیکھ کر بیٹا شدید صدمے میں آ گیا۔
شیورام سولنکی نے پولیس کو بتایا کہ گزشتہ تین برسوں سے اس کے والد کو اپنی بیوی پر جادو ٹونے کا شبہ تھا اور وہ اکثر اسے اسی بات پر ہراساں کرتے تھے۔ ان کا کہنا تھا کہ ان کی ماں اور بچے مل کر ان پر کرنی کر رہے ہیں، اسی وجہ سے انہوں نے بچوں کے گھر آنے پر بھی پابندی لگا دی تھی۔ چند دن پہلے ہونے والے ایک جھگڑے میں انہوں نے بیوی کو قتل کرنے کی دھمکی بھی دی تھی۔
واقعے کی اطلاع ملنے پر دھاراوی پولیس فوری طور پر موقع پر پہنچی اور زخمی خاتون کو سایَن اسپتال منتقل کیا گیا جہاں ڈاکٹروں نے انہیں مردہ قرار دیا۔ پولیس نے ملزم کو گرفتار کر کے اس کے خلاف بھارتیہ نیائے سہنتا (بی این ایس) کی دفعہ 103 کے تحت قتل کا مقدمہ درج کیا ہے اور مزید تفتیش جاری ہے۔
ہندوستھان سماچار
--------------------
ہندوستان سماچار / جاوید این اے
