نئی دہلی، 14مارچ(ہ س)۔

عام آدمی پارٹی کے قومی کنوینر اور دہلی کے سابق وزیر اعلیٰ اروند کیجریوال نے مبینہ شراب گھوٹالہ کیس کو لے کر ایک بار پھر وزیر اعظم نریندر مودی پر سخت حملہ کیا ہے۔ اس بار انہوں نے یوٹیوبر دھرو راٹھی کی اس تحقیقی ویڈیو رپورٹ کا حوالہ دیتے ہوئے وزیر اعظم کو نشانہ بنایا ہے جو شراب گھوٹالہ معاملے میں نچلی عدالت کے فیصلے پر مبنی ہے۔ انہوں نے ملک کے عوام سے اس ویڈیو کو دیکھنے کی اپیل کرتے ہوئے کہا کہ اب عوام بھی کہنے لگے ہیں کہ مودی جی کی مقبولیت تیزی سے کم ہو رہی ہے۔ مودی جی بے ایمانی اور سازش کے ذریعے انتخابات جیت رہے ہیں۔ اسی لیے عام آدمی پارٹی کے خلاف آزاد ہندوستان کی سب سے بڑی سازش رچی گئی اور دہلی کی اقتدار پر قبضہ کیا گیا۔اروند کیجریوال نے سوشل میڈیا پر یوٹیوبر دھرو راٹھی کی اس ویڈیو کو شیئر کرتے ہوئے کہا کہ لوگ مانتے ہیں کہ مودی جی کی مقبولیت تیزی سے گھٹتی جا رہی ہے۔ اب وہ بے ایمانی اور سازش کے ذریعے انتخابات جیت رہے ہیں۔انہوں نے ملک کے عوام سے اپیل کی کہ وہ دھرو راٹھی کی اس ویڈیو کو ضرور دیکھیں۔ اس ویڈیو میں بتایا گیا ہے کہ کس طرح عام آدمی پارٹی کے خلاف آزاد ہندوستان کی سب سے بڑی سازش رچی گئی اور کس طرح دہلی کی اقتدار پر قبضہ کیا گیا۔ انہوں نے کہا کہ یہ معاملہ صرف عام آدمی پارٹی کا نہیں بلکہ ہمارے ملک کو بچانے کا ہے۔ ہر محبِ وطن کو یہ ویڈیو ضرور دیکھنی چاہیے۔دوسری جانب دہلی کے سابق نائب وزیر اعلیٰ اور عام آدمی پارٹی پنجاب کے انچارج منیش سسودیا نے بھی دھرو راٹھی کی ویڈیو شیئر کرتے ہوئے بی جے پی کی مبینہ سازشوں کو نشانہ بنایا۔ انہوں نے کہا کہ دھرو راٹھی نے نام نہاد شراب گھوٹالہ کی حقیقت پر ایک انتہائی شاندار اور حقائق پر مبنی ویڈیو بنائی ہے۔ اس ویڈیو میں وہ بہت واضح انداز میں بتاتے ہیں کہ اس مبینہ گھوٹالے کی کہانی اس دن سے شروع نہیں ہوتی جب دہلی کی ایکسائز پالیسی بنی۔منیش سسودیا نے کہا کہ دراصل اس کی شروعات اس وقت ہوئی جب دہلی میں عام آدمی پارٹی نے تیسری مرتبہ 70 میں سے 62 نشستیں جیت کر حکومت بنائی۔ جب پنجاب میں 117 میں سے 93 نشستیں جیت کر تاریخی کامیابی حاصل ہوئی۔ جب گوا میں پہلی بار الیکشن لڑ کر عام آدمی پارٹی نے 2 نشستیں جیت لیں۔ جب گجرات میں پہلی بار میدان میں اتر کر بھی مودی کے مبینہ ناقابلِ تسخیر قلعے میں 5 نشستیں جیت لیں۔ اور جب ہماچل پردیش میں بھی اقتدار کی کرسی ڈگمگانے لگی۔ تب ایک انا پرست اور غیر تعلیم یافتہ حکمراں کے اشارے پر ایک کہانی گھڑی گئی، ایک جھوٹا بیانیہ تیار کیا گیا اور پھر ایک ایک کر کے عام آدمی پارٹی کے لیڈروں کو جیل میں ڈالنے کا سلسلہ شروع کر دیا گیا۔ انہوں نے کہا کہ اس پورے معاملے کی تہہ تک پہنچنے اور حقیقت کو سمجھنے کے لیے دھرو راٹھی کی یہ ویڈیو ہر شخص کو ضرور دیکھنی چاہیے۔

ہندوستھان سماچار

ہندوستان سماچار / Md Owais Owais