وارانسی، 13 مارچ (ہ س)۔ اتر پردیش کے مذہبی شہر وارانسی میں رمضان کے مقدس مہینے کے آخری جمعہ کو گیانواپی اور دیگر مساجد میں سخت سیکورٹی کے درمیان عقیدت اور احترام کے ساتھ نمازجمعہ ادا کی گئی۔ نماز کے بعد جب امام نے دعا کی تو نمازیوں کی آنکھیں آنسوو¿ں سے بھر گئیں۔ بارگاہِ الٰہی میں روزہ داروں نے بھی اللہ تعالیٰ سے اپنے خاندان، کاروبار، معاشرے اور ملک کی سلامتی اور ترقی کی دعا کی۔

شہر کی تمام مساجد اور عبادت گاہوں میں ائمہ اور خطبانے رمضان المبارک کے حوالے سے خطبہ دیا۔ خطبات میں کہا گیا کہ ہم سب خوش نصیب ہیں کہ اللہ تعالیٰ نے ہمیں اس مقدس مہینے سے نوازا ہے۔ اس سے قبل رمضان المبارک کے اس آخری جمعہ کے موقع پر صبح سے ہی روزہ داروں میں جوش و خروش دیکھا گیا۔ ندیسر جامع مسجد، لنگڑے حافظ مسجد نیو روڈ، شیعہ جامع مسجد دارا نگر، لاٹ سرایا مسجد کے علاوہ پولیس لائن، اردلی بازار، دوشی پورہ، مکیم گنج، بڑی بازار، پیلی کوٹھی، دال منڈی، ہردھا سرائے، مدن پورا، ریوڑی تالاب وغیرہ علاقوں کی مساجد میں بھی نمازیں ادا کی گئیں۔

اذان کے بعد تمام مساجد نمازیوں سے بھر گئیں۔ زیادہ ہجوم کی وجہ سے بہت سے نمازیوں کو نماز پڑھنے کے لیے دوسری مساجد میں جانا پڑا۔ مساجد میں نمازیوں کے لیے وضو کا انتظام کیا گیا۔ مسجد کی انتظامی کمیٹیوں نے قالین، چٹائیاں، سائبان اور پانی بھی فراہم کیا۔ دریں اثناءضلع بھر میں نماز کے لیے سکیورٹی کے سخت انتظامات کیے گئے تھے۔

پولیس فورس نے صبح سے ہی شہر کے حساس علاقوں اور دیہی علاقوں، مخلوط آبادی والے علاقوں میں گشت شروع کر دیا۔ تمام چھوٹی بڑی مساجد کے باہر صبح سے ہی فورس تعینات تھی۔ ایڈیشنل پولیس کمشنر (لا اینڈ آرڈر اور ہیڈ کوارٹر) شیوہاری مینا نے فورس کے ساتھ حساس علاقوں کا معائنہ کیا۔ انہوں نے چوکا گھاٹ سے ناٹیملی، دوسی پورہ، کجک پورہ وغیرہ علاقوں کا دورہ کیا اور سیکورٹی انتظامات، پولیس کی تعیناتی، ہجوم کا انتظام، ٹریفک انتظامات کے بارے میں جانکاری حاصل کی۔ ڈرون اور سی سی ٹی وی کیمروں سے اہم مقامات کی نگرانی کی گئی۔

---------------

ہندوستان سماچار / عبدالسلام صدیقی