ایل جی اور وزیر اعلیٰ نے عوام کو جمعتہ الوداع کی مبارکباد پیش کی

جموں، 13 مارچ (ہ س)۔ جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ نے جمعۃ الوداع کے موقع پر لوگوں کو مبارکباد اور نیک تمنائیں پیش کی ہیں۔ لیفٹیننٹ گورنر منوج سنہا نے اپنے پیغام میں کہا کہ اس بابرکت موقع پر وہ تمام لوگوں کو دلی مبارکباد پیش کرتے ہیں اور دعا کرتے ہیں کہ اللہ تعالیٰ ہر شہری کو صحت، خوشی اور خوشحالی عطا فرمائے۔ انہوں نے کہا کہ رمضان المبارک کے آخری جمعہ کے موقع پر ہمیں دعا کرنی چاہیے کہ اللہ تعالیٰ ہماری عبادات اور دعاؤں کو قبول فرمائے اور ہمیں ہمدردی، اتحاد اور پائیدار ہم آہنگی کی راہ پر گامزن رکھے۔

ادھر وزیر اعلیٰ عمر عبداللہ نے بھی جموں و کشمیر کے عوام کو جمعۃ الوداع کے مقدس موقع پر مبارکباد پیش کی۔ اپنے پیغام میں انہوں نے کہا کہ رمضان المبارک کا آخری جمعہ مسلمانوں کے لیے خاص روحانی اہمیت رکھتا ہے۔ انہوں نے لوگوں سے اپیل کی کہ اس مقدس دن کو عبادت، خود احتسابی اور معاشرے میں امن، خوشحالی اور بھائی چارے کے لیے دعا کرنے کے لیے استعمال کریں۔

وزیر اعلیٰ نے کہا کہ یہ مبارک موقع جموں و کشمیر کے لوگوں کے لیے امن، ترقی اور خوشحالی کا پیغام لے کر آئے۔عمر عبداللہ نے عوام سے یہ بھی اپیل کی کہ وہ اس بابرکت مہینے میں غریب اور ضرورت مند افراد کو یاد رکھیں اور ان کی مدد کریں، کیونکہ رمضان ہمیں ہمدردی، سخاوت اور بھائی چارے کا درس دیتا ہے۔ انہوں نے امید ظاہر کی کہ اس مقدس موقع پر کی جانے والی دعائیں ایک زیادہ منصفانہ، پرامن اور خوشحال معاشرے کی تعمیر میں مددگار ثابت ہوں گی۔

ہندوستھان سماچار

---------------

ہندوستان سماچار / محمد اصغر