حجاج کو بہترین سہولیات فراہم کرنے کے لیے حج کمیٹی پرعزم — کوثر جہاں

نئی دہلی، 12 مارچ (ہ س):۔

گزشتہ دنوں حکومتِ دہلی کے گزٹ (غیر معمولی) مورخہ 9 مارچ کے ذریعے دہلی اسٹیٹ حج کمیٹی کی مدتِ کار میں آئندہ چھ ماہ کی توسیع کے بعد 12 مارچ کو توسیع شدہ حج کمیٹی کی پہلی میٹنگ منعقد کی گئی۔ اس میٹنگ میں چیئرپرسن محترمہ کوثر جہاں، ممبر محترمہ نازیہ دانش (نگم پارشد)، ممبر محمد سعد، حج کمیٹی کے ایگزیکٹو آفیسر اشفاق احمد عارفی اور ڈپٹی ایگزیکٹو آفیسرمحسن علی نے شرکت کی۔میٹنگ میں حج 2026 کے لیے کی جانے والی انتظامات پر تفصیلی غور و خوض کیا گیا۔ اس سلسلے میں محکمہ محصولات حکومتِ دہلی (ہیڈکوارٹر) کے ڈپٹی کمشنر اور ضلع وسطی کے ڈی ایم جی سدھاکر کی نگرانی میں دہلی کے معروف رام لیلا میدان میں حج انتظامات سے متعلق کیے جانے والے کاموں کی تیاری کے لیے تمام متعلقہ محکموں، مثلاً دہلی میونسپل کارپوریشن، دہلی اربن شیلٹر امپروومنٹ بورڈ، دہلی پولیس، دہلی جل بورڈ، محکمہ صحت، بجلی محکمہ وغیرہ کے افسران کے ساتھ رام لیلا میدان کا مشترکہ معائنہ کیا گیا۔ تمام متعلقہ محکموں کے افسران کو ہدایت دی گئی کہ تمام ضروری کام جلد از جلد آئندہ ماہ اپریل کے پہلے ہفتے تک مکمل کر لیے جائیں۔

واضح رہے کہ حج 2026 کا سفر 18 اپریل سے شروع ہوگا اور 20 مئی تک جاری رہے گا۔ اس دوران دہلی اسٹیٹ حج کمیٹی کے انتظامات کے تحت دہلی سمیت ملک کی مختلف ریاستوں کے تقریباً 22 ہزار حجاج کرام دہلی سے اپنی مقدس حج کے سفر کے لیے روانہ ہوں گے۔

ہندوستھان سماچار

ہندوستان سماچار / Md Owais Owais