کویت سٹی،23فروری(ہ س)۔کویت نے قومی فوجی سروس کے حوالے سے نئی ترامیم کی ہیں، جن میں 2012 میں پیدا ہونے والے ان شہریوں کو پابند کیا گیا ہے جو 4 سال بعد اپنی عمر کے 18 سال مکمل کریں گے کہ وہ عمر کی حد کو پہنچنے کے 180 دنوں کے اندر قومی فوجی سروس (لازمی بھرتی) کے متعلقہ ادارے میں درخواست دیں۔ یہ بات العربیہ کے رپورٹر نے بتائی ہے۔

نئے قانون میں فوجی سروس کی ادائیگی سے مستثنیٰ پانچ زمروں کا تعین کیا گیا ہے، جن میں یکم جنوری 2012 سے پہلے پیدا ہونے والے افراد اور وہ لوگ شامل ہیں جن کا تعین کابینہ مفاد عامہ کے تقاضوں کے مطابق کرے گی۔نئی ترمیم میں سرکاری یا نجی ملازمتوں میں تقرری، یا آزاد پیشہ اختیار کرنے کا لائسنس حاصل کرنے کے لیے سروس کی ادائیگی، استثنائ یا التوا کا سرٹیفکیٹ پیش کرنا شرط قرار دیا گیا ہے، جبکہ سروس مکمل کرنے والوں کو ترجیح دی جائے گی۔ اسی طرح کسی بھی شخص کی تقرری پر پابندی یا سروس ادا نہ کرنے، سروس میں ہونے یا اس سروس کے لیے طلب کیے جانے کی وجہ سے تقرری سے انکار پر پابندی ہوگی، جب تک کہ اس نے قومی فوجی سروس اتھارٹی سے یہ سرٹیفکیٹ حاصل کر لیا ہو کہ تقرری میں کوئی رکاوٹ نہیں ہے۔نئی ترامیم کے تناظر میں، کویت نے تربیت کا دورانیہ مکمل کرنے کے بعد فوج کے چیف آف جنرل اسٹاف یا ان کے نائب کی جانب سے جاری کردہ پلان اور احکامات کے مطابق مختلف فوجی یونٹوں میں رنگروٹوں کی تقسیم سے متعلق ایک ترمیم کی ہے۔

نئی ترمیم میں اس مدت کو فعال سروس کی مدت میں شمار نہیں کیا جائے گا جو کوئی رنگروٹ عدالتی حکم کی تعمیل میں قید میں گزارے یا منشیات کی لت کے علاج کے لیے کسی بحالی مرکز میں گزارے۔کویت نے قومی فوجی سروس کی ادائیگی سے ان طلبہ کو مستثنیٰ قرار دیا ہے جو فوجی تعلیم کے لیے قائم کالجوں، اداروں اور اسکولوں میں زیر تعلیم ہیں۔ ان کے علاوہ وہ لوگ جو فوج، پولیس، نیشنل گارڈ یا جنرل فائر فورس میں فوجی عہدے پر تعینات یا رضاکار ہیں، بشرطیکہ ان کی سروس کی مدت پانچ سال سے کم نہ ہو۔ اس کے ساتھ ساتھ کویت پیٹرولیم کارپوریشن اور اس سے وابستہ کمپنیوں کے فائر فائٹرز کو بھی مستثنیٰ قرار دیا گیا ہے بشرطیکہ ان کی سروس کی مدت پانچ سال سے کم نہ ہو۔اسی تناظر میں ایسے مکلف فرد کو بھی استثنیٰ دیا گیا ہے جو کسی ایسی جسمانی یا نفسیاتی بیماری یا معذوری میں مبتلا ہو جو اسے فعال سروس کے لیے طبی فٹنس کی شرائط کے مطابق سروس کی ادائیگی سے روکتی ہو۔ استثنیٰ اور التوا کے معاملات کو لاگو کرنے کے لیے بعض دفعات میں ترمیم کی گئی ہے، اور ان لوگوں کے خلاف انتظامی جرمانوں کا ایک تدریجی نظام متعارف کرایا گیا ہے جو کسی جائز عذر کے بغیر رجسٹریشن یا شمولیت میں تاخیر کریں یا اس سے انکار کریں۔ یہ اضافی مدت کی صورت میں ہوگا جو تاخیر کی مدت سے منسلک ہوگی، جبکہ خود سے پہل کرنے یا اچھی کارکردگی کی صورت میں اس سے استثناءکا امکان بھی موجود ہے۔ یہ نظام اس طرح ڈیزائن کیا گیا ہے جو سرزنش اور ترغیب دونوں کا مجموعہ ہے۔

ہندوستھان سماچار

ہندوستان سماچار / Mohammad Khan