جموں, 22 فروری (ہ س)جموں و کشمیر کے پونچھ ضلع کے ایک دور افتادہ گاؤں میں فوج نے کارروائی کرتے ہوئے دہشت گردوں کا ایک خفیہ ٹھکانہ بے نقاب کر دیا اور وہاں سے ایک پستول سمیت دیگر لاجسٹک سامان برآمد کیا۔فوج کے مطابق یہ ٹھکانہ ایک قدرتی غار کے اندر قائم کیا گیا تھا، جس کا سراغ ہری بدھا باؤل کے علاقے میں تلاشی مہم کے دوران ملا۔ اس حوالے سے فوج کی وائٹ نائٹ کارپس نے سوشل میڈیا پلیٹ فارم ایکس پر ایک بیان جاری کرتے ہوئے بتایا کہ فوجی اہلکاروں نے مشتبہ مقامات، بالخصوص غار نما ڈھانچوں کی منظم تلاشی کے دوران اس ٹھکانے کو دریافت کیا۔بیان کے مطابق برآمد شدہ اشیاء میں ایک پستول، کپڑے اور کھانے پینے کا سامان شامل ہے۔ فوج کا کہنا ہے کہ یہ کارروائی علاقے میں مسلسل نگرانی اور پیشگی کنٹرول کی حکمت عملی کو مزید مضبوط بناتی ہے۔

ہندوستھان سماچار

---------------

ہندوستان سماچار / محمد اصغر