جموں, 21 فروری (ہ س)۔
آل انڈیا انسٹی ٹیوٹ آف میڈیکل سائنسز جموں کے شعبۂ فارنسک میڈیسن نے جموں و کشمیر پولیس کے افسران کے لیے چار روزہ ’’سرٹیفکیٹ کورس اِن فارنسک میڈیسن اینڈ سائنسز‘‘ کامیابی کے ساتھ منعقد کیا۔یہ اقدام ملک میں اپنی نوعیت کا پہلا پروگرام قرار دیا جا رہا ہے، جس کے ذریعے اے آئی آئی ایم ایس جموں پولیس افسران کے لیے خصوصی فارنسک کورس متعارف کرانے والا ملک کا پہلا اے آئی آئی ایم ایس ادارہ بن گیا ہے۔
اس کورس کا تصور اور خاکہ کورس ڈائریکٹر پروفیسر (ڈاکٹر) دنیش راؤ، پروفیسر و سربراہ شعبۂ فارنسک میڈیسن نے تیار کیا۔ تربیتی پروگرام میں 25 پروبیشنری ڈپٹی سپرنٹنڈنٹس آف پولیس (ڈی ایس پیز) اور 36 پروبیشنری پولیس سب انسپکٹرز (پی ایس آئیز) نے شرکت کی۔نصاب میں فارنسک شناخت، فارنسک تھاناٹولوجی، فارنسک بیلسٹکس، جائے واردات کی تفتیش، شواہد کو محفوظ کرنے کے طریقے، منشیات کے تجزیے، مشتبہ دستاویزات کی جانچ، ٹرامیٹک پیتھالوجی اور دم گھٹنے سے ہونے والی اموات جیسے اہم موضوعات شامل تھے۔
کورس کے آخری دن شرکاء کا جائزہ لیا گیا اور کامیاب قرار پانے والے افسران کو اسناد سے نوازا گیا۔ اختتامی تقریب میں ایگزیکٹو ڈائریکٹر و سی ای او پروفیسر (ڈاکٹر) ڈی این شرما، ڈائریکٹر شیرِ کشمیر پولیس اکیڈمی گریب داس، اور ڈپٹی ڈائریکٹر سیکپا راجندر کمار گپتا نے شرکت کی۔
اس موقع پر پروفیسر (ڈاکٹر) دنیش راؤ نے جدید مجرمانہ تحقیقات میں فارنسک سائنس کے کلیدی کردار پر زور دیتے ہوئے کہا کہ پولیس کی معمول کی تربیت میں فارنسک اصولوں کو شامل کرنا وقت کی اہم ضرورت ہے۔ گریب داس نے قانون نافذ کرنے والے اداروں کے لیے فارنسک تعلیم کی بڑھتی اہمیت کو اجاگر کرتے ہوئے متعلقہ وزارتوں کے اشتراک سے ایسے اقدامات کو مزید مضبوط بنانے کے عزم کا اظہار کیا۔پروفیسر (ڈاکٹر) ڈی این شرما نے اس پروگرام کو ادارہ جاتی اشتراک اور بین الشعبہ جاتی صلاحیت سازی کی جانب ایک اہم سنگِ میل قرار دیتے ہوئے کہا کہ اے آئی آئی ایم ایس جموں صحت کے شعبے سے آگے بڑھ کر قومی اہمیت کے دیگر شعبوں میں بھی پیشہ ورانہ ترقی کے لیے اپنا کردار ادا کرتا رہے گا۔
ہندوستھان سماچار
---------------
ہندوستان سماچار / محمد اصغر
