شروعاتی کاروبار میں شیئر بازار پر دباو، سینسیکس اور نفٹی میں گراوٹ

نئی دہلی، 08 جنوری (ہ س)۔ گھریلو شیئر مارکیٹ میں آج ابتدائی کاروبار کے دوران کمزوری کا رجحان بنا ہوا ہے۔ آج کے کاروبار کی شروعات بھی گراوٹ کے ساتھ ہوئی تھی۔ مارکیٹ کھلتے ہی خریداروں نے خریداری کا زور بنانے کی کوشش کی، لیکن خریداری کا دور لمبا نہیں چل سکا۔ تھوڑی دیر بعد ہی فروخت کنندگان مارکیٹ پر حاوی ہو گئے، جس کی وجہ سے سینسیکس اور نفٹی دونوں انڈیکس کی کمزوری مزید بڑھ گئی۔ پہلے 1 گھنٹے کا کاروبار ہونے کے بعد سینسیکس 0.24 فیصد اور نفٹی 0.33 فیصد کی کمزوری کے ساتھ کاروبار کر رہے تھے۔

ابتدائی ایک گھنٹے کا کاروبار ہونے کے بعد شیئر مارکیٹ کے سرکردہ شیئروں میں سے ایٹرنل، اڈانی پورٹس، آئی سی آئی سی آئی بینک، ایس بی آئی لائف انشورنس اور بجاج فائنانس کے شیئر 2.08 فیصد سے لے کر 0.43 فیصد کی مضبوطی کے ساتھ کاروبار کر رہے تھے۔ دوسری جانب، ہنڈالکو انڈسٹریز، ٹی سی ایس، جے ایس ڈبلیو اسٹیل، وپرو اور ایچ ڈی ایف سی لائف کے شیئر 2.16 فیصد سے لے کر 1.05 فیصد کی گراوٹ کے ساتھ کاروبار کرتے ہوئے نظر آ رہے تھے۔

ابھی تک کے کاروبار میں شیئر مارکیٹ میں 2,618 شیئروں میں ایکٹیو ٹریڈنگ ہو رہی تھی۔ ان میں سے 1,100 شیئر منافع کما کر سبز نشان میں کاروبار کر رہے تھے، جبکہ 1,518 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 12 شیئر خریداری کی حمایت سے سبز نشان میں برقرار تھے۔ دوسری جانب 18 شیئر فروخت کے دباو میں سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 17 شیئر سبز نشان میں اور 33 شیئر سرخ نشان میں کاروبار کرتے نظر آ رہے تھے۔

بی ایس ای کا سینسیکس آج 183.12 پوائنٹس کی کمزوری کے ساتھ 84,778.02 پوائنٹس کی سطح پر کھلا۔ کاروبار کی شروعات ہوتے ہی خریداری کی حمایت سے پہلے 5 منٹ میں ہی یہ انڈیکس اچھل کر 84,965.27 پوائنٹس تک پہنچ گیا، لیکن تیزی کا یہ دور برقرار نہیں رہ سکا۔ تھوڑی دیر بعد ہی فروخت شروع ہو گئی، جس سے سینسیکس کی چال میں گراوٹ آ گئی۔ مسلسل ہو رہی فروخت کے سبب یہ انڈیکس 84,678.85 پوائنٹس کی سطح تک گر گیا۔ حالانکہ اس کے بعد خریداروں نے ایک بار پھر خریداری کا زور بنانے کی کوشش کی، جس سے اس انڈیکس کی حالت میں سدھار ہونے لگا۔ مارکیٹ میں مسلسل جاری خرید و فروخت کے درمیان پہلے 1 گھنٹے کا کاروبار ہونے کے بعد صبح 10.15 بجے سینسیکس 205.50 پوائنٹس کی گراوٹ کے ساتھ 84,755.64 پوائنٹس کی سطح پر کاروبار کر رہا تھا۔

سینسیکس کی طرح ہی این ایس ای کے نفٹی نے آج 34.25 پوائنٹس ٹوٹ کر 26,106.50 پوائنٹس کی سطح سے کاروبار کی شروعات کی۔ مارکیٹ کھلتے ہی خریداری کی حمایت ملنے سے یہ انڈیکس اچھل کر 26,133.20 پوائنٹس کی سطح تک پہنچا، لیکن اس کے بعد مارکیٹ میں فروخت شروع ہو گئی۔ مسلسل ہو رہی فروخت کی وجہ سے پہلے 20 منٹ کے کاروبار میں ہی نفٹی 26,049.85 پوائنٹس کی سطح تک گر گیا۔ اس کے بعد خریداروں نے ایک بار پھر خریداری کا زور بنایا، جس سے اس انڈیکس کی حالت میں سدھار ہونے لگا۔ مارکیٹ میں مسلسل جاری خرید و فروخت کے درمیان ابتدائی 1 گھنٹے کا کاروبار ہونے کے بعد صبح 10.15 بجے نفٹی 85.90 پوائنٹس کی کمزوری کے ساتھ 26,054.85 پوائنٹس کی سطح پر کاروبار کر رہا تھا۔

ہندوستھان سماچار

---------------

ہندوستان سماچار / انظر حسن