علی گڑھ،05 جنوری (ہ س)۔

علی گڑھ مسلم یونیورسٹی کے بی ٹیک، فوڈ ٹکنالوجی سال سوم کے طالب علم اور شوٹر زہیر خان نے فرخ آباد کے ڈاکٹر کرنی سنگھ شوٹنگ رینج میں منعقدہ 68ویں نیشنل شوٹنگ چیمپئن شپ مقابلوں (شاٹ گن) میں شاندارکارکردگی کا مظاہرہ کرتے ہوئے مردوں کے ٹریپ کا طلائی تمغہ اپنے نام کیا۔

زہیر اس سے قبل جونیئر زمرہ کے ٹریپ مقابلے میں کانسہ کا تمغہ جیت چکے ہیں، انھوں نے سینئر زمرے میں پُراعتماد انداز میں قدم رکھا اور دباؤ میں غیرمعمولی ڈسپلن کا مظاہرہ کیا۔ انہوں نے فائنل میں 43 درست نشانے لگا کر اپنا پہلا سینئر قومی خطاب حاصل کیا۔ پورے فائنل کے دوران پرسکون انداز برقرار رکھتے ہوئے زہیر نے اس وقت مواقع سے بھرپور فائدہ اٹھایا، جب کئی تجربہ کار نشانہ باز لغزش کا شکار ہورہے تھے۔ جونیئر سطح کی کامیابی سے سینئر سطح تک ان کا ہموار سفر ان کی بڑھتی ہوئی پختگی کو ظاہر کرتا ہے اور قومی شاٹ گن شوٹنگ میں اتر پردیش کی موجودگی کو بھی مضبوط بناتا ہے۔ کوچ اور عہدیداران نے ان کی کارکردگی کو سراہا۔ اس کامیابی کے ساتھ زہیر اگلے قومی کیمپوں اور بین الاقوامی انتخابی ٹرائلز کے لیے ایک مضبوط دعویدار بن کر ابھرے ہیں۔

ہندوستھان سماچار

ہندوستان سماچار / سید کامران علی گڑھ