نئی دہلی، 20 جنوری (ہ س)۔ مانچسٹر سٹی نے اپنے دفاعی مسائل کے درمیان کرسٹل پیلس کے اسٹار ڈیفینڈر مارک گوئیہی کو سائن کرنے کا باضابطہ اعلان کر دیا ہے۔ کلب نے پیر کو سوشل میڈیا کے ذریعے اطلاع دی کہ گوئیہی نے جون 2031 تک کے لیے معاہدے پر دستخط کیے ہیں۔

25 سالہ انگلینڈ کے ڈیفینڈر مارک گوئیہی ستمبر 2025 کے ٹرانسفر ڈیڈ لائن ڈے پر لیورپول کے قریب پہنچ گئے تھے، لیکن وہ معاہدہ آخری وقت پر طے نہیں پا سکا تھا۔ اب گوئیہی مانچسٹر سٹی کی جرسی میں نظر آئیں گے۔

گوئیہی نے مئی میں کھیلے گئے ایف اے کپ فائنل میں کرسٹل پیلس کی قیادت کرتے ہوئے مانچسٹر سٹی کے خلاف خطاب جتوایا تھا۔ وہ اب تک انگلینڈ کے لیے 26 بین الاقوامی میچ کھیل چکے ہیں۔

مانچسٹر سٹی کے منیجر پیپ گارڈیولا نے حال ہی میں ڈیفنس میں کھلاڑیوں کی کمی کو لے کر تشویش ظاہر کی تھی۔ پریمیئر لیگ میں آرسنل سے 7 پوائنٹس پیچھے دوسرے مقام پر چل رہی سٹی کے لیے یہ ایک بڑا چیلنج بنی ہوئی تھی۔

گوئیہی کے سائن ہونے سے پہلے گارڈیولا نے کہا تھا، ”جان (اسٹونز) کے بغیر، روبن (ڈیاز) کے بغیر اور جوسکو (گوارڈیول) کے بغیر ہم مشکل صورتحال میں ہیں اور یہ صرف ایک میچ کی بات نہیں بلکہ طویل مدتی مسئلہ ہے۔ روبن جلد لوٹیں گے، لیکن جوسکو نہیں۔ جان کو لے کر ہمیں امید ہے۔“

مارک گوئیہی کے آنے سے مانچسٹر سٹی کے ڈیفنس کو مضبوطی ملنے کی امید ہے۔

ہندوستھان سماچار

---------------

ہندوستان سماچار / انظر حسن