گووند پانسرے قتل کا مرکزی ملزم سمیر گائیکواڑ دل کا دورہ پڑنے سے فوتممبئی ، 20 جنوری (ہ س)۔ گووند پانسرے قتل کیس میں نامزد مرکزی ملزم سمیر گائیکواڑ (43) کا سانگلی میں انتقال ہو گیا۔ حکام کے مطابق اسے 20 جنوری کو دل کا دورہ پڑا، جس کے بعد اسے اسپتال لے جایا گیا، مگر وہ جانبر نہ ہو سکا۔

سمیر گائیکواڑ گزشتہ کچھ عرصے سے ضمانت پر رہا تھا اور سانگلی کے وکاس چوک علاقے میں رہائش پذیر تھا۔ پیر کی رات اچانک سینے میں درد اٹھنے پر اہلِ خانہ نے اسے سانگلی سول اسپتال پہنچایا، جہاں صبح کے وقت ڈاکٹروں نے بتایا کہ وہ علاج کے دوران جان کی بازی ہار گیا۔

واضح رہے کہ سمیر گائیکواڑ پر الزام تھا کہ اس نے 16 فروری 2015 کو کولہاپور میں کمیونسٹ پارٹی کے بزرگ رہنما گووند پانسرے اور ان کی اہلیہ اوما پنسرے پر فائرنگ کی تھی۔ اس واقعے کے بعد پولیس نے طویل تفتیش کے بعد انہیں 16 ستمبر 2015 کو سانگلی سے گرفتار کیا تھا۔ پولیس کارروائی میں ان کے پاس سے کئی موبائل سم کارڈز بھی برآمد کیے گئے تھے۔

بعد میں شواہد کی کمی اور بعض تکنیکی نکات کی بنیاد پر عدالت نے 2017 میں انہیں مشروط ضمانت دے دی تھی۔ اس کے بعد اس قتل کیس کی تفتیش ریاستی اے ٹی ایس کے حوالے کر دی گئی تھی، جس نے سمیر گائیکواڑ اور 9 دیگر ملزمان کے خلاف الزامات عائد کیے تھے۔ مرکزی ملزم کی موت کے بعد یہ معاملہ ایک بار پھر زیرِ بحث آ گیا ہے، جبکہ پانسرے قتل کیس کی آئندہ قانونی صورتحال پر بھی سب کی نظریں مرکوز ہو گئی ہیں۔

ہندوستھان سماچار

--------------------

ہندوستان سماچار / جاوید این اے