کوکراجھار (آسام)، 20 جنوری (ہ س): کوکراجھار ضلع میں امن و امان کی سنگین صورتحال کے پیش نظر، آسام حکومت نے فوری اثر سے موبائل انٹرنیٹ خدمات کو معطل کر دیا ہے۔ یہ حکم آئندہ ہدایات تک نافذ العمل رہے گا۔

حکومتی حکم کے مطابق، یہ واقعہ 19 جنوری کی رات کو پیش آیا جب ایک اسکارپیو گاڑی نے کوکراجھار پولیس اسٹیشن کے تحت کاریگاو¿ں چوکی کے قریب مان سنگھ روڈ پر دو قبائلی مردوں کو ٹکر ماری۔ گاڑی میں سفر کر رہے تین بوڈو نوجوانوں کو قریبی قبائلی دیہاتیوں نے مبینہ طور پر مارا پیٹا، جبکہ اسکارپیو گاڑی کو آگ لگا دی گئی۔

اس واقعے کے بعد بوڈو اور قبائلی برادریوں کے درمیان کشیدگی بڑھ گئی۔ کاریگاو¿ں چوکی کے قریب قومی شاہراہ بلاک کر دی گئی۔ مظاہرین نے ٹائر جلائے، کچھ گھروں اور ایک دفتر کی عمارت کو آگ لگا دی، اور کاریگاو¿ں چوکی پر بھی حملہ کیا گیا۔

صورتحال کی سنگینی کو دیکھتے ہوئے ریپڈ ایکشن فورس (آر اے ایف) کو صورتحال پر قابو پانے کے لیے تعینات کیا گیا ہے۔ انتظامیہ کو ضلع میں امن و عامہ کے ممکنہ خلل کا خدشہ ہے۔

حکومت نے یہ بھی خدشہ ظاہر کیا کہ سوشل میڈیا اور انٹرنیٹ کو اشتعال انگیز پیغامات اور افواہیں پھیلانے کے لیے استعمال کیا جا سکتا ہے، جس سے صورتحال مزید خراب ہو سکتی ہے۔ اس کی روشنی میں موبائل انٹرنیٹ خدمات کو معطل کر دیا گیا ہے۔

تاہم، آرڈر میں واضح کیا گیا ہے کہ فکسڈ ٹیلی فون لائنوں پر مبنی وائس کال سروسز اور براڈ بینڈ سروسز اس مدت کے دوران کام کرتی رہیں گی۔ حکم کی خلاف ورزی پر تعزیری کارروائی کی جائے گی۔

یہ نوٹیفکیشن گورنر کے حکم پر حکومت آسام کے ہوم اینڈ پولیٹیکل ڈیپارٹمنٹ کے ایڈیشنل چیف سکریٹری اجے تیواری نے جاری کیا ہے۔

---------------

ہندوستان سماچار / عبدالسلام صدیقی