برلن،13جنوری(ہ س)۔جرمنی کے وزیر خارجہ یوہان فادفول(Johann Wadephul) نے پیر کے روز گرین لینڈ پر امریکا کی جانب سے حملے کے خطرے کو کم قرار دیا۔یہ بیان ایسے وقت میں سامنے آیا ہے، جب امریکی صدر ڈونلڈ ٹرمپ بارہا ڈنمارک جو نیٹو کی اتحادی ہے، اس کے جزیرے پر کنٹرول حاصل کرنے کی دھمکیاں دے چکے ہیں۔ایک سوال کے جواب میں جس میں امریکا کی جانب سے یکطرفہ فوجی کارروائی کے امکان کے بارے میں پوچھا گیا تھا، جو امریکی وزیر خارجہ مارکو روبیو سے ملاقات کے بعد سامنے آیا، فادیفول نے کہا:میرے پاس کوئی ایسا اشارہ نہیں ہے کہ اس معاملے پر سنجیدگی سے غور کیا جا رہا ہو۔انہوں نے مزید کہا:بلکہ میرا خیال ہے کہ آرکٹک خطے میں ابھرنے والے سیکیورٹی مسائل سے نمٹنے میں ہمارا مشترکہ مفاد ہے، ہمیں یہی کرنا چاہیے اور ہم کریں گے۔انہوں نے کہا:نیٹو اس وقت اس حوالے سے زیادہ حقیقت پسندانہ منصوبے تیار کر رہا ہے، ان پر بعد میں ہمارے امریکی شراکت داروں کے ساتھ تبادلہ خیال کیا جائے گا۔

فادیفول کا یہ دورہ ایسے وقت میں ہو رہا ہے، جب اسی ہفتے واشنگٹن میں متوقع مذاکرات ہونے جا رہے ہیں، جن میں روبیو کے ساتھ ڈنمارک اور خودمختار حیثیت رکھنے والے گرین لینڈ کے اعلیٰ سفارت کار شریک ہوں گے۔ڈونلڈ ٹرمپ گرین لینڈ کو امریکا کے کنٹرول میں لانے پر اصرار کرتے رہے ہیں اور انہوں نے ڈنمارک کے اس خطے کی امریکی قومی سلامتی کے لیے اہمیت پر زور دیا ہے۔گرین لینڈ جس کی آبادی تقریباً 57 ہزار نفوس پر مشتمل ہے، رقبے کے لحاظ سے وسیع اور معدنی وسائل سے مالا مال ہے، جبکہ اس کا محلِ وقوع اسے اسٹریٹجک اہمیت بھی فراہم کرتا ہے۔گرین لینڈ کی حکومت نے پیر کے روز اعلان کیا کہ جزیرہ کسی بھی صورت میں اپنے علاقے پر امریکی قبضے کی کوشش کو قبول نہیں کرے گا، اس بات کو یقینی بنانے کے لیے اپنی کوششیں تیز کرے گا کہ نیٹو کے دائرہ کار میں ان علاقوں کا دفاع کیا جا سکے۔

ہندوستھان سماچار

ہندوستان سماچار / Mohammad Khan