گوالیار، 07 دسمبر (ہ س)۔ مدھیہ پردیش کے شیوپور ضلع میں واقع کونو نیشنل پارک میں آزادانہ گھوم رہے دو چیتے اتوار کو جنگل سے نکل کر سڑک پر آ گئے۔ اسی دوران آگرہ-ممبئی نیشنل ہائی وے (شیوپوری لنک روڈ) پر گھاٹی گاوں سمریا موڑ پر ایک تیز رفتار نامعلوم گاڑی نے ایک چیتے کو کچل دیا، جس سے اس کی موقع پر ہی موت ہو گئی۔

اطلاع ملتے ہی گھاٹی گاوں تھانہ پولیس اور محکمہ جنگلات کے افسران نے موقع پر پہنچ کر حادثہ کی جانچ شروع کر دی ہے۔ چیتے کی لاش کو کونو پہنچایا جا رہا ہے، جہاں، ماہرین کا پینل پوسٹ مارٹم کرے گا۔ وہیں، محکمہ جنگلات کی ٹیم دوسرے چیتے کی تلاش میں مصروف ہو گئی ہے۔

کونو کے کھلے جنگل میں گھومنے کے لیے چھوڑے گئے 2 چیتے اتوار کی صبح تقریباً 5 سے 6 بجے کے درمیان سڑک پر آ گئے تھے۔ ”سیٹلائٹ کالر آئی ڈی“ سے لگاتار چیتوں پر نظر رکھی جا رہی تھی۔ جیسے ہی سڑک حادثہ ہوا، کونو کے افسران کو اس کی معلومات مل گئی اور وہ فوراً موقع پر پہنچ گئے۔ اس دوران جائے حادثہ پر بھاری بھیڑ جمع ہو گئی، لیکن محکمہ جنگلات کے افسران نے پولیس تک کو پاس نہیں آنے دیا۔ پوری کارروائی محکمہ جنگلات کے افسران ہی کر رہے ہیں۔ بتایا گیا ہے کہ جس چیتے کی موت ہوئی ہے، اس کا نام کے جی بی-3 (مادہ) ہے۔ اس کی پیدائش کونو نیشنل پارک میں ہی ہوئی تھی۔ یہ گامنی کا بچہ بتایا جا رہا ہے۔

محکمہ جنگلات کے افسران نے بتایا کہ گامنی نامی مادہ چیتا کے دو بچے کے جی بی-3 اور کے جی بی-4 کونو کے جنگل سے نکل کر گھاٹی گاوں کے جنگل میں پہنچ گئے تھے۔ دونوں کی لوکیشن گھاٹی گاوں کے سمریا موڑ کے آس پاس آ رہی تھی۔ کونو سے محکمہ جنگلات کی ٹیم مسلسل ان کو ٹریس کر رہی تھی۔ ہفتہ کی شام کو سمریا علاقے میں ایک گائے پر دونوں چیتوں نے حملہ کیا تھا، جس میں گائے کی موت ہو گئی تھی۔ تبھی سے محکمہ جنگلات کی ٹیم ان پر نظر رکھ رہی تھی۔ اتوار کی علی الصبح 5 بجے کے تقریباً وہ گھاٹی گاوں کے جنگل سے نکل کر آگرہ-ممبئی نیشنل ہائی وے پر سڑک پار کر دوسری طرف جا رہے تھے کہ تبھی ایک تیز رفتار نامعلوم گاڑی نے ایک چیتے کو ٹکر مار دی۔ ٹکر اتنی تیز تھی کہ چیتا ہائی وے کنارے گرا اور اس نے موقع پر ہی دم توڑ دیا۔ حادثے کے بعد جب چیتا پڑا لوگوں نے دیکھا تو پولیس اور محکمہ جنگلات کو اطلاع دی۔ اس کے بعد کونو انتظامیہ اور محکمہ جنگلات کے افسران موقع پر پہنچے اور چیتے کی لاش کو اپنی نگرانی میں لے لیا۔ اب کونو نیشنل پارک میں ایکسپرٹ کے ذریعے چیتے کا پوسٹ مارٹم کیا جائے گا۔ وہیں، محکمہ جنگلات کی ٹیم کے ذریعے بچے کے جی بی-4 کی تلاش کی جا رہی ہے۔

گھاٹی گاوں ایس ڈی او پی شیکھر دوبے نے بتایا کہ اتوار کی صبح تقریباً 5 بجے چیتا گھاٹی گاوں کے سیمریا موڑ کے پاس آگرہ-ممبئی نیشنل ہائی وے پر پہنچ گیا تھا۔ اسی دوران کسی نامعلوم گاڑی نے اسے ٹکر مار دی، جس کی وجہ سے وہ اچھل کر ہائی وے کے کنارے پر جا گرا۔ ہائی وے پر چیتے کا خون بکھرا ہوا ہے۔ زخمی بچہ کسی طرح جھاڑیوں میں گیا ہوگا اور وہیں اس نے دم توڑ دیا۔

قابل ذکر ہے کہ گزشتہ 48 گھنٹوں میں یہ دوسرے چیتے کی موت ہے۔ اس سے پہلے جمعہ کی شام کو بھی مادہ چیتا ویرا کا ایک بچہ جنگل میں مردہ ملا تھا، جسے اس کی ماں اور ایک بھائی کے ساتھ ایک دن پہلے یعنی جمعرات کو چیتا دن کے موقع پر کونو نیشنل پارک سے آزاد کیا گیا تھا۔ اگلے ہی دن اس کی لاش جنگل میں ملی تھی۔ چیتا پروجیکٹ کے فیلڈ ڈائریکٹر اتم کمار شرما نے بتایا کہ اتوار کو ہوئی چیتا کے بچے کی موت کے بعد کونو نیشنل پارک میں چیتوں کی کل تعداد اب 27 رہ گئی ہے۔ ان میں 8 بالغ چیتے (5 مادہ اور 3 نر) اور ہندوستان میں پیدا ہوئے 19 بچے شامل ہیں۔ پارک کے دیگر تمام چیتے صحت مند بتائے گئے ہیں۔

ہندوستھان سماچار

---------------

ہندوستان سماچار / انظر حسن