شملہ، 6 دسمبر (ہ س)۔ ہماچل پردیش میں سردی کی لہر مسلسل بڑھ رہی ہے جس سے لوگوں کی مشکلات میں اضافہ ہو رہا ہے۔ منالی کے پہاڑی مقام پر سیزن کی اب تک کی سب سے سرد رات ریکارڈ کی گئی، جہاں کم از کم درجہ حرارت 1.1 ڈگری سیلسیس تک گر گیا، جو کہ گزشتہ 24 گھنٹوں میں 2.3 ڈگری کی گراوٹ ہے۔ اونچے اور درمیانی پہاڑی علاقوں میں سردی کی لہر شدت اختیار کر گئی ہے اور محکمہ موسمیات نے کل 7 دسمبر کو ان علاقوں میں برف باری کی پیش گوئی کی ہے۔گزشتہ جمعہ کی رات تیز ہواؤں نے بھی سردی کی شدت میں اضافہ کر دیا۔ لاہول اسپیتی کے تابو میں 39 کلومیٹر فی گھنٹہ اور کنور کے ریکانگ پیو میں 37 کلومیٹر فی گھنٹہ کی رفتار سے ہوا چل رہی ہے۔

محکمہ کے مطابق 8 سے 12 دسمبر تک موسم دوبارہ صاف رہے گا تاہم اگلے دو روز تک ریاست کے میدانی علاقوں میں کئی مقامات پر گھنی دھند کا الرٹ جاری کیا گیا ہے۔ آج دھند کی وجہ سے بلاس پور میں حد نگاہ صرف 100 میٹر ریکارڈ کی گئی جبکہ منڈی میں بھی دھند کا اثر دیکھا گیا۔ دسمبر کی خشک سردی نے لوگوں کو مزید پریشان کر دیا ہے کیونکہ ریاست میں گزشتہ ایک ماہ سے بارش نہیں ہوئی ہے جس کی وجہ سے بارش اور برف باری دونوں کی کمی ہے۔ جس کا براہ راست اثر زراعت پر پڑ رہا ہے اور گیہوں سمیت دیگر فصلوں کی بوائی متاثر ہوئی ہے۔

زرعی ماہرین کا کہنا ہے کہ اگر موسم اسی طرح خشک رہا تو اس سے فصلوں کی کاشت اور پیداوار بری طرح متاثر ہو سکتی ہے۔ لاہول اسپیتی اور کنور کے قبائلی اضلاع میں کم از کم درجہ حرارت صفر سے کئی ڈگری نیچے رہا اور قدرتی پانی کے ذرائع منجمد ہو گئے۔ کوکمسیری میں کم از کم درجہ حرارت-5.6 ڈگری،تابو میں 4.4-ڈگری اور کنور کے کلپا میں 0.6- ڈگری سیلسیس درج کیا گیا۔ ریاست کے کئی دوسرے شہر بھی شدید سردی سے متاثر ہیں، ایک درجن شہروں میں کم سے کم درجہ حرارت 5 ڈگری سے نیچے چلا گیا ہے۔

دوسرے شہروں کے کم سے کم درجہ حرارت کی بات کریں تو شملہ میں 8.6، سندرنگر میں 2، بھنتر میں 1.5،دھرمشالہ میں 6،اونا میں 5.9،ناہن میں 10.3،پالم پور اور سولن میں 3-3، کانگڑا میں 4.4، منڈی میں 3.1،بلاس پور میں 6.7،ہمیر پور میں 3.2، کفری میں 5.2، جبڑ ہٹی میں 7.8،نارکنڈہ میں 2.2، ریکانگ پیو میں 2.1اور سراہن میں 4.8ڈگری سیلسیس رہا۔

ریاست کا اوسط کم از کم درجہ حرارت معمول سے 0.9 ڈگری کم ریکارڈ کیا گیا، گزشتہ 24 گھنٹوں میں 0.2 ڈگری کی کمی درج کی گئی ہے۔ میدانی علاقوں میں شدید سردی نے لوگوں کو گھروں کے اندر رکنے پر مجبور کر دیا ہے اور صبح و شام سڑکوں پر ٹریفک کا نظام درہم برہم ہو کر رہ گیا ہے۔

ہندوستھان سماچار

ہندوستان سماچار / محمد شہزاد