نئی دہلی، 5 دسمبر (ہ س):۔

دہلی کی پٹیالہ ہاؤس کورٹ نے گینگسٹر لارنس بشنوئی کے بھائی انمول بشنوئی کی قومی تفتیشی ایجنسی (این آئی اے) کی تحویل میں سات دن کی توسیع کر دی ہے۔ سیکورٹی وجوہات کی بنا پر پٹیالہ ہاؤس کورٹ کے جج نے ذاتی طور پر این آئی اے ہیڈکوارٹر میں سماعت میں شرکت کی۔

اس سے قبل پٹیالہ ہاؤس کورٹ نے انمول بشنوئی کی این آئی اے حراست میں 5 دسمبر تک توسیع کی تھی۔ این آئی اے کے وکیل راہل تیاگی نے توسیع کی درخواست کرتے ہوئے کہا کہ انہیں مزید معلومات کے انکشاف کے لیے مزید پوچھ گچھ کی ضرورت ہے۔ اس کے بعد عدالت نے انمول بشنوئی کی این آئی اے حراست میں مزید سات دن کی توسیع کا حکم دیا۔

سدھو موسے والا کے قتل کے بعد انمول بشنوئی 2022 میں جعلی پاسپورٹ کے ذریعے امریکہ فرار ہو گیا تھا۔ بشنوئی مہاراشٹرا این سی پی لیڈر بابا صدیقی کے قتل کا بھی ملزم ہے۔ بشنوئی نے امریکی عدالت میں سیاسی پناہ کی درخواست کی لیکن اس کی درخواست مسترد کر دی گئی۔ بعد میں بشنوئی کو دہلی ڈی پورٹ کر دیا گیا اور این آئی اے نے 19 نومبر کو دہلی ہوائی اڈے سے گرفتار کر لیا۔

انمول بشنوئی کو جنوری میں مفرور قرار دیا گیا تھا۔ بشنوئی کے خلاف ملک بھر میں 22 مقدمات زیر التوا ہیں۔ تحقیقاتی ایجنسیاں مئی 2022 میں پنجابی گلوکار سدھو موسے والا کے قتل کے سلسلے میں انمول بشنوئی سے بھی تفتیش کر رہی ہیں۔ انمول بشنوئی پر لارنس بشنوئی گینگ کے لیے دہلی، ہریانہ، پنجاب اور راجستھان میں بھتہ خوری کے سنڈیکیٹ چلانے کا الزام ہے۔

ہندوستھان سماچار

ہندوستان سماچار / عطاءاللہ