جموں, 31 دسمبر (ہ س)جموں کے بشنہ علاقے سے گزرنے والا رنگ روڈ اب جدید نگرانی نظام کے تحت آئے گا۔ رنگ روڈ اتھارٹی نے پولیس انتظامیہ کے اشتراک سے 58 کلو میٹر طویل اس شاہراہ پر ہائی کیپیسٹی سی سی ٹی وی کیمرے نصب کرنے کا فیصلہ کیا ہے، جس کا مقصد جرائم، تیز رفتاری اور سڑک حادثات پر مؤثر روک لگانا ہے۔حکام کے مطابق رنگ روڈ کی تعمیر کے بعد ٹریفک میں سہولت تو بڑھی، تاہم اس راستے پر جرائم اور حادثات میں بھی اضافہ دیکھنے میں آیا۔ ملزمان واردات کے بعد اسی شاہراہ کو فرار کے لیے استعمال کرتے رہے، جس کے باعث پولیس کو شناخت اور گرفتاری میں دشواری پیش آتی تھی۔ اب جدید سی سی ٹی وی نظام کے نفاذ سے ایسے عناصر کی نقل و حرکت پر کڑی نظر رکھی جا سکے گی۔

رنگ روڈ اتھارٹی کے مطابق رایا موڑ سے نگروٹہ آئی ٹی آئی کالج تک 58 کلو میٹر طویل حصے میں ہر 700 میٹر کے فاصلے پر ایک کیمرہ نصب کیا جا رہا ہے، جس کی نگرانی کی صلاحیت تقریباً ایک کلو میٹر تک ہوگی۔ مجموعی طور پر قریب 70 اعلیٰ معیار کے سی سی ٹی وی کیمرے لگائے جائیں گے۔ حکام نے بتایا کہ منصوبے کا بیشتر کام مکمل ہو چکا ہے اور آئندہ دو ہفتوں میں تنصیب کا عمل مکمل کر لیا جائے گا۔

کمپنی کے ایک تکنیکی ماہر کے مطابق تمام سی سی ٹی وی کیمرے سولر سسٹم سے منسلک ہوں گے، جبکہ سڑک کے مختلف مقامات پر ہائی ماسٹ لائٹس بھی نصب کی جا رہی ہیں تاکہ دن اور رات ہر وقت آمد و رفت پر واضح نظر رکھی جا سکے۔سی سی ٹی وی کیمروں کی مانیٹرنگ کے لیے ٹول پلازہ کے قریب ایک کنٹرول روم قائم کیا جائے گا، جہاں تکنیکی عملہ مسلسل نگرانی کرے گا۔ اس منصوبے کا ٹھیکہ بیرون ریاست کی ایک کمپنی کو دیا گیا ہے، جو کیمروں کے ساتھ سولر پینل بھی نصب کر رہی ہے۔ اس کے ساتھ ہی رنگ روڈ پر گاڑیوں کی رفتار کی حد مقرر کی جائے گی، جس سے تیز رفتاری اور جرائم پر قابو پانے میں مدد ملے گی۔

ایس پی ہیڈکوارٹر جموں ارشاد احمد راتھر نے کہا کہ سی سی ٹی وی کیمروں کی تنصیب سے پولیس کو جرائم کی روک تھام، ملزمان کی شناخت اور حادثات کی تحقیقات میں خاطر خواہ مدد ملے گی۔ انہوں نے امید ظاہر کی کہ اس اقدام سے سڑک حادثات میں نمایاں کمی آئے گی۔دریں اثنا، بشنہ کے رکن اسمبلی راجیو بھگت نے کہا کہ رنگ روڈ پر سی سی ٹی وی کیمروں کی تنصیب ایک اہم اور بروقت قدم ہے، جس سے نہ صرف جرائم پیشہ عناصر پر نکیل کسی جائے گی بلکہ مقامی لوگوں کو بھی محفوظ سفری سہولت میسر آئے گی۔

ہندوستھان سماچار

---------------

ہندوستان سماچار / محمد اصغر