لکھنؤ، 28 دسمبر (ہ س)۔ وزیر اعلیٰ یوگی آدتیہ ناتھ کے وژن اور تحریک سے اتر پردیش کی بیٹیاں نہ صرف خود کفیل بن رہی ہیں بلکہ اب بین الاقوامی بازار میں بھی اپنی الگ پہچان بنانے کے لیے تیار ہیں۔ ملیٹس پر مبنی آرگینک فوڈ اسٹارٹ اپ کے ذریعے یوپی کی دو بیٹیوں نے ایسا کارنامہ انجام دیا ہے جو ریاست کی نئی کاروباری طاقت کی علامت بن رہا ہے۔ دہلی–این سی آر میں مضبوط موجودگی قائم کرنے کے بعد اب ان کا ہدف گلف ممالک کی مارکیٹ ہے، جہاں آرگینک اور ملیٹس مصنوعات کو مقبول بنانے کی بھرپور تیاری کی جا رہی ہے۔ اس مقصد کے لیے کسانوں کو خصوصی تربیت دے کر قدرتی اور کیمیکل سے پاک کھیتی کو فروغ دیا جا رہا ہے۔

دہلی یونیورسٹی سے تعلیم حاصل کرنے کے بعد روایتی کیریئر کا راستہ چھوڑ کر گاؤں واپس لوٹنے والی شکھا سنگھ چوہان اور سومیا سنگھ نے سماجی کاروبار (سوشل انٹرپرینیورشپ) کا راستہ اختیار کیا۔ شکھا سنگھ چوہان دہلی یونیورسٹی سے گریجویٹ اور نیشنل فارینزک سائنسز یونیورسٹی، گاندھی نگر (گجرات) سے فوڈ ٹیکنالوجی میں پوسٹ گریجویٹ ہیں۔ جبکہ سومیا سنگھ دہلی یونیورسٹی سے فوڈ ٹیکنالوجی میں بی ٹیک ہیں۔

سوہا آرگینکس کی کو-فاؤنڈر شکھا سنگھ چوہان ناگلی واجدپور، سیکٹر 130، گوتم بدھ نگر کی رہنے والی ہیں، جبکہ ان کی پارٹنر سومیا سنگھ باغپت ضلع کی رہائشی ہیں۔ کیمیائی خوراک اور اس سے پیدا ہونے والے مسائل سے لوگوں کو بچانے کے مقصد سے انہوں نے ملیٹس–آرگینک فوڈ اسٹارٹ اپ کی شروعات کی۔ یہ اسٹارٹ اپ فارم ٹو فورک ماڈل پر کام کرتا ہے، جس کے تحت چھوٹے کسانوں سے براہِ راست خام مال خریدا جاتا ہے اور انہیں مناسب قیمت ادا کی جاتی ہے۔ دلالوں کے خاتمے سے سپلائی چین شفاف ہوئی ہے اور صارفین کو خالص، کیمیکل سے پاک اور غذائیت سے بھرپور مصنوعات دستیاب ہو رہی ہیں۔

شکھا سنگھ چوہان نے بتایا کہ آرگینک اور ملیٹس مصنوعات کی بڑھتی ہوئی عالمی مانگ کو دیکھتے ہوئے اب اگلا ہدف گلف ممالک کی مارکیٹ ہے۔ بین الاقوامی معیار کے مطابق پیکیجنگ اور کوالٹی کنٹرول پر خصوصی توجہ دی جا رہی ہے تاکہ بیرونِ ملک بھی اتر پردیش کا نام روشن کیا جا سکے۔

صحت، پائیداری اور خواتین کے بااختیار بنانے سے جڑی یوپی کی بیٹیوں کی یہ کامیابی کی داستان ثابت کرتی ہے کہ اگر درست پالیسی، سرکاری تعاون اور مضبوط عزم ہو تو ہماری بیٹیاں عالمی سطح پر بھی پرچم لہرا سکتی ہیں۔ ملیٹس–آرگینک فوڈ اسٹارٹ اپ کے ذریعے ابھرتی یہ پہل نہ صرف ایک کاروبار ہے بلکہ خود کفیل اتر پردیش کی نئی شناخت بھی ہے۔

ہندوستھان سماچار

---------------

ہندوستان سماچار / عبدالواحد