سرینگر، 26 دسمبر،(ہ س)۔ فائر اینڈ ایمرجنسی سروسز جموں و کشمیر نے جمعہ کو کہا کہ اس نے گزشتہ 24 گھنٹوں کے دوران کشمیر ڈویژن کے مختلف اضلاع میں آتشزدگی کے پانچ الگ الگ واقعات میں اہم۔رول ادا کیا۔ فائر اینڈ ایمرجنسی سروسز جے اینڈ کے کے حکام کے مطابق سوپور کے پٹن علاقے میں تریکولبل میں آگ لگنے کے واقعے میں خشک گھاس پر مشتمل دو گھاس کے ڈھیر جل گئے۔ آگ پر قابو پانے اور قریبی املاک تک پھیلنے سے روکنے کے لیے فائر ٹینڈرز موقع پر پہنچ گئے۔ ایک اور بڑے واقعے میں سرینگر کے ایم اے روڈ پر سٹی مال کے قریب 246 بٹالین سی آر پی ایف کے اسٹور رومز کے ساتھ ایک منزلہ سی آر پی ایف بیرک میں آگ لگ گئی۔ فائر فائٹرز نے مسلسل کوششوں کے بعد آگ پر قابو پالیا جس سے مصروف علاقے میں ایک بڑا حادثہ ہونے سے بچا۔ پلوامہ ضلع کے ترال علاقے کے کچمولہ میں آگ لگنے سے ایک دو منزلہ رہائشی مکان کو نقصان پہنچا جبکہ بانڈی پورہ ضلع کے سمبل کے آرام پورہ واگے محلہ میں ایک کریانہ کی دکان کو آگ لگنے سے نقصان پہنچا۔ بڈگام ضلع کے ناربل میں ایک اور رہائشی مکان آگ سے متاثر ہوا۔ فائر اینڈ ایمرجنسی سروسز نے کہا کہ فائر فائٹرز نے تمام کارروائیوں کے دوران غیر معمولی ہمت اور پیشہ ورانہ مہارت کا مظاہرہ کیا، انتھک محنت کی اور املاک کی حفاظت اور آگ کے پھیلاؤ کو روکنے کے لیے اپنی جانوں کو خطرے میں ڈالا۔ دریں اثنا، ایڈیشنل ڈائریکٹر جنرل آف پولیس، فائر اینڈ ایمرجنسی سروسز، آلوک کمار نے کہا کہ محکمہ کی جاری کوششوں کے تحت آگ لگنے کے واقعات میں نمایاں کمی ریکارڈ کی گئی ہے۔ انہوں نے اس بہتری کی وجہ فائر سیفٹی سے متعلق آگاہی کے باقاعدہ پروگراموں، روزانہ کی فرضی مشقوں اور فوری ہنگامی ردعمل کے طریقہ کار کو قرار دیا۔

انہوں نے اس بات پر زور دیا کہ فعال عوامی تعاون اور فائر سیفٹی ایڈوائزری پر سختی سے عمل کرنے سے پورے خطے میں آتشزدگی کے واقعات کو صفر تک کم کرنے کے مقصد کو حاصل کرنے میں مدد مل سکتی ہے۔ہندوستھان سماچار

ہندوستان سماچار / Aftab Ahmad Mir