واشنگٹن،21دسمبر( ہ س)۔زہران ممدانی کی نیتن یاہوکوگرفتاری کی دھمکی، اسرائیلی وزیراعظم نیویارک کے دورے کےلئے پرعزماسرائیلی وزیر اعظم بن جمن نیتن یاھو نے اعلان کیا ہے کہ وہ جلد ہی نیو یارک شہر کا دورہ کریں گے۔ ان کا یہ اعلان نیویارک کے نو منتخب میئر زہران ممدانی کی طرف سے دی گئی دھمکی کے باوجود انہیں چیلنج کرنےکے مترادف قرار دیا جا رہا ہے۔ چند ہفتے قبل بروکلین سٹی کونسل کی رکن اینا فرنیکوف نے انہیں یکم جنوری کو مدعو کیا تھا۔ اسی تاریخ کو نو منتخب میئر زہران ممدانی کی حلف برداری ہے۔ ممدانی نے نیتن یاھو کو نیویارک کے دورے کے دوران گرفتار کرنے کی دھمکی دی تھی۔فرنیکوف جو اپنی قدامت پسندانہ رجحانات کے لیے جانی جاتی ہیں نے نیتن یاھو کو دعوت دی تھی تاکہ نیو یارک اور اسرائیل کے درمیان گہرے اور دیرپا تعلقات کو دوبارہ اجاگر کیا جا سکے۔ نیتن یاھو نے رسمی پیغام بھیجا، جس میں انہوں نے دعوت پر شکریہ ادا کیا اور کہا کہ وہ جلدہی نیویارک کا دورہ کریں گے۔ البتہ وہ زہران ممدانی کی تقریب حلف برداری میں شرکت نہیں کریں گے۔فرنیکوف نے نیو یارک پوسٹ کو بتایا کہ وہ ’نیتن یاھو کے نیو یارک پہنچنے پر ممدانی کے ردعمل دیکھنے کے لیے بے تاب ہیں‘۔ انہوں نے کہا کہ نو منتخب میئر ’کسی غیر ملکی وزیر اعظم کو گرفتار کرنے کے لیے قانونی اختیار نہیں رکھتے۔ انہوں نے ممدانی پر الزام عائد کیا کہ وہ عوام کو گمراہ کر رہے ہیں۔ وہ سادہ قانونی تحقیق کرنے کی صلاحیت بھی نہیں رکھتے‘۔یہ پیش رفت شہر میں حالیہ دنوں کے دوران بڑھتے ہوئے تشدد کے واقعات کے پس منظر میں سامنے آئی ہے، جہاں فرنیکوف نے زور دیا کہ یہودی کمیونٹی نیتن یاھو کا ’بہت بڑے خیرمقدم‘ کے ساتھ استقبال کرے گی۔

مسلمان زہران ممدانی ایک مہاجر خاندان کی اولاد ہیں اور بائیں بازو کے رجحانات کے حامل ہیں۔ انہوں نے اپنی انتخابی مہم کے دوران عہد کیا تھا کہ نیو یارک پولیس کے ذریعے نیتن یاھو کو گرفتار کیا جائے گا۔ ان کا کہنا تھا کہ سنہ 2024ءمیں عالمی فوجداری عدالت نے نیتن یاھو اور سابق اسرائیلی وزیر دفاع یوآف گیلنٹ کے خلاف غزہ میں جنگی جرائم کے الزام میں گرفتاری کے نوٹس جاری کیے تھے، جنہیں امریکہ تسلیم نہیں کرتا۔نیتن یاھو نے حالیہ انٹرویو میں کہا کہ وہ نیو یارک جانے سے’خائف نہیں‘ ہیں۔ اسی سلسلے میں اسرائیل کے حامی ریپبلکن رکن کانگریس ایلیس سٹیفانک نے ایک بل پیش کیا ہے تاکہ ریاست میں نیتن یاھو کی گرفتاری کی کسی بھی کوشش کو روکا جا سکے۔ انہوں نے نیو یارک کی گورنر کیتھی ہوکول پر الزام عائد کیا کہ انہوں نے ممدانی کے بیانات کی مذمت نہیں کی۔ انہوں نے ممدانی کے بیانات کو ’انتہا پسندانہ‘ قرار دیا۔

ہندوستھان سماچار

ہندوستان سماچار / Mohammad Khan