پورنیہ، 9 نومبر (ہ س)۔ بہار کے ضلع پورنیہ کی قصبہ اسمبلی حلقے میں منعقد انتخابی جلسے میں لوک جن شکتی پارٹی (رام ولاس) کے قومی صدر چراغ پاسوان نے این ڈی اے امیدوار نتیش کمار سنگھ کے حق میں عوامی حمایت حاصل کی۔

انہوں نے کہا کہ اس بار کے رجحانات سے صاف ظاہر ہے کہ بہار میں بھاری اکثریت سے این ڈی اے کی حکومت بننے جا رہی ہے، اس لیے قصبہ میں بھی این ڈی اے کے امیدوار نتیش سنگھ کو تاریخی کامیابی دلانی چاہیے۔ اسی دوران انہوں نے نتیش سنگھ کو جیت کی مالا پہنائی اور عوام سے متحد ہو کر حمایت کی اپیل کی۔

قصبہ اسمبلی حلقہ اس انتخاب میں خاصی چرچا میں ہے، کیونکہ یہاں این ڈی اے کے نتیش سنگھ کا مقابلہ انڈیا اتحاد کے کانگریس امیدوار عرفان عالم سے ہے۔ کانگریس کے حق میں راہل گاندھی سمیت کئی بڑے لیڈروں کی عوامی سبھائیں ہو چکی ہیں، وہیں این ڈی اے لگاتار علاقے میں اپنی انتخابی تشہیر تیز کیے ہوئے ہے۔

جلسہ عام سے خطاب کرتے ہوئے نتیش سنگھ نے کہا کہ وہ ترقی کو اپنی سب سے بڑی ترجیح مانتے ہیں۔ انہوں نے کہا، ’’میں ترقی پسند آدمی ہوں اور اگر عوام کا آشیرواد ملا تو قصبہ اسمبلی حلقے کو ترقی کے ہر پیمانے پر آگے لے جاؤں گا۔‘‘

ہندوستھان سماچار

ہندوستان سماچار / انظر حسن