نیویارک ،06نومبر (ہ س )۔

نیویارک کے نو منتخب میئرزہران ممدانی اس وقت پوری دنیا میں موضوع بحث بنے ہوئے ہیں ۔چونکہ ان کی جیت ایک تاریخی جیت ہے اس لئے ہر طرف جیت کے بعد کی گئی ان کی تقریر موضوع بحث بنی ہوئی ہے ۔دریں اثنا انہوں نے تارکین وطن اقلیتوں کے سلسلے میں جو اظہار خیال کیا اس نے سب کے دل جیت لئے ہیں ۔انہوں نے اپنی پہلی تقریر میں عربی زبان میں تارکین وطن سے اظہار یک جہتی کر کے سب کے دل جیت لیے۔گزشتہ روز ایشیائی نژادزہران ممدانی نے امریکہ کے سب سے اہم شہروں میں سے ایک نیویارک کے پہلے مسلم اور بائیں بازو کے میئر منتخب ہو کر تاریخ رقم کردی۔34 سالہ نو منتخب میئرزہران ممدانی نے اپنی تقریر میں تارکین وطن کی تعریف کی اور اپنی جیت کا سہرا ان کے سر سجایا، انہوں نے عربی زبان میں ان سے اظہار یک جہتی بھی کیا۔بروکلین پیراماو¿نٹ تھیٹر میں اپنے پہلے خطاب میں انہوں نے کہا کہ یہ سب آپ کی وجہ سے ممکن ہوا ہے، اس لیے سب سے پہلے آپ کا شکر گزار ہوں، نیویارک کی نسل نو کا شکریہ، اب سے ایک نئے عہد کا آغاز ہوگا۔انہوں نے کہا کہ ہم آپ کے لیے جدوجہد کریں گے، کیونکہ ہم آپ میں سے ہی ایک ہیں، جیسا کہ ہم اسٹین وے میں کہتے ہیں ’انا منکم و علیکم‘ (میں آپ میں سے ایک ہوں اور آپ کے لیے ہوں)۔ واضح رہے کہ کوئنز کے بورو میں واقع، اسٹین وے اسٹریٹ کو اکثر ’لٹل مصر‘ کہا جاتا ہے، جہاں بہت سے عربیوں کے کیفے، شیشہ لاو¿نجز، بیکریاں اور ریسٹورنٹس ہیں۔انہوں نے تارکین وطن اور اقلیتوں کے گروہوں کا بھی شکریہ ادا کیا اور کہا کہ ان سب کا شکریہ جنہیں اکثر اس شہر کی سیاست میں بھلا دیا جاتا ہے، جنہوں نے اس تحریک کو اپنا بنا لیا۔ یہ شہر آپ کا شہر ہے، یہ جمہوریت آپ کی جمہوریت ہے۔واضح رہے کہ یہ پہلا موقع نہیں ہے جب زہران ممدانی نے عربی بول کر اپنے آپ کو نیویارک کی اقلیتوں کا حامی قرار دیا ہو بلکہ اس سے قبل بھی وہ اپنی انتخابی مہم کے دوران اپنے ووٹرز کے لیے عربی زبان میں ویڈیو جاری کرچکے ہیں۔

ہندوستھان سماچار

ہندوستان سماچار / عطاءاللہ