جموں و کشمیر پولیس نے دو مبینہ ملزمان کو پی ایس اے کے تحت گرفتار کیا

جموں، 5 نومبر (ہ س)۔ جموں و کشمیر کے جموں اور کشتواڑ میں دو مبینہ ملزمان کو پبلک سیفٹی ایکٹ (پی ایس اے) کے تحت حراست میں لیا گیا ہے۔ پولیس نے بتایا کہ تجیندر سنگھ عرف ہیپی ساکن سمبل کیمپ جموں کو پی ایس اے کے تحت حراست میں لے کر پونچھ جیل منتقل کیا گیا ہے۔ پولیس ترجمان کے مطابق، تجیندر سنگھ ایک سخت گیر مجرم ہے جس کا ریکارڈ سنگین اور پرتشدد جرائم سے بھرا ہوا ہے۔ متعدد بار گرفتاریوں اور قانونی کارروائیوں کے باوجود اس نے قانون کی صریح خلاف ورزی جاری رکھی اور سماج کے امن و امان کے لیے خطرہ بن گیا۔ ترجمان نے مزید کہا کہ عوامی امن کے تحفظ اور مزید جرائم سے باز رکھنے کے لیے اس کی احتیاطی حراست ضروری سمجھی گئی۔

ترجمان کے مطابق ملزم کے خلاف مختلف تھانوں میں متعدد ایف آئی آر درج ہیں۔ اسی طرح، کشتواڑ کے زیور گاؤں کے سلیم جاوید کو بھی منشیات کی اسمگلنگ میں ملوث ہونے پر پی ایس اے کے تحت حراست میں لے کر جموں کی کوٹ بھلوال جیل منتقل کیا گیا ہے۔ ترجمان نے بتایا کہ سلیم جاوید کشتواڑ قصبے میں نوجوانوں کو منشیات فراہم کرنے والا ایک اہم اسمگلر تھا اور تحقیقات کے دوران اس کی بار بار ملوثیت سامنے آنے پر اس کی حراست ضروری قرار دی گئی تاکہ نوجوان نسل کو منشیات کے زہر سے بچایا جا سکے۔

دریں اثنا، پولیس نے منگل کے روز جموں کے میرن صاحب علاقے سے بدنامِ زمانہ منشیات فروش مراد علی کو گرفتار کیا اور اس کے قبضے سے 29.60 گرام ہیروئن برآمد کی۔پولیس کے مطابق، گرفتار ملزم کے خلاف این ڈی پی ایس ایکٹ کی مختلف دفعات کے تحت مقدمہ درج کر کے مزید تحقیقات شروع کر دی گئی ہیں۔

ہندوستھان سماچار

---------------

ہندوستان سماچار / محمد اصغر