نئی دہلی، 4 نومبر (ہ س)۔ قومی انسانی حقوق کمیشن (این ایچ آر سی) نے بنگلورو میں ایک شخص سے اس کی بیٹی کی موت کے بعد ایمبولینس ڈرائیور، پولیس افسران، قبرستان کے عملے اور میونسپل کے اہلکاروں کے ذریعہ مبینہ طور پر رشوت لیے جانے کے واقعے کا از خود نوٹس لیا ہے ۔ کمیشن نے کرناٹک کے چیف سکریٹری اور ڈائرکٹر جنرل آف پولیس کو نوٹس جاری کرتے ہوئے دو ہفتوں کے اندر تفصیلی رپورٹ طلب کی ہے۔

این ایچ آر سی نے کہا کہ میڈیا رپورٹس سے پتہ چلتا ہے کہ 64 سالہ شخص کی اکلوتی بیٹی، آئی آئی ٹی مدراس اور آئی آئی ایم احمد آباد سے گریجویٹ تھی اور بنگلورو میں کام کرتی تھی، کو 18 ستمبر کو برین ہیمرج ہوا تھا۔ اس کی موت کے بعد، جب والد نے ایمبولینس کو بلایا، ڈرائیور نے بہت زیادہ کرایہ وصول کیا۔ موت کی اطلاع ملنے پر پولیس نے کوئی ہمدردی نہیں دکھائی اور رشوت وصول کرنے کے بعد ہی ایف آئی آر اور پوسٹ مارٹم رپورٹ کی کاپیاں فراہم کیں۔

رپورٹ میں بتایا گیا کہ متوفی کے اہل خانہ نے اس کی آنکھیں عطیہ کیں لیکن شمشان گھاٹ پر بھی ملازمین نے رقم کا مطالبہ کیا۔ مہادیو پورہ میونسپل کارپوریشن کے افسران نے موت کا سرٹیفکیٹ جاری کرنے میں تاخیر کی اور رشوت دینے کے بعد ہی اسے جاری کیا۔ کمیشن نے کہا کہ اگر رپورٹ میں حقائق درست ہیں تو یہ انسانی حقوق کی سنگین خلاف ورزی ہے۔ این ایچ آر سی نے ریاستی حکومت سے اس واقعہ اور کی گئی کارروائی پر دو ہفتوں کے اندر مکمل رپورٹ طلب کی ہے۔

ہندوستھان سماچار

ہندوستان سماچار / محمد شہزاد