واشنگٹن، 19 نومبر (ہ س)۔

امریکی صدر ڈونالڈ ٹرمپ نے منگل کے روز والٹ ڈزنی کمپنی کے اے بی سی نیٹ ورک سے وابستہ چینلز کے نشریاتی لائسنسوں کو چھین لئے جانے کا مطالبہ کیا۔

میڈیا رپورٹس کے مطابق ٹرمپ نے یہ مطالبہ ایک رپورٹر کی جانب سے جیفری ایپسٹین اسکینڈل سے متعلق دستاویزات کے اجراء کے حوالے سے سوال کے بعد کیا۔ صدر نے اے بی سی نیوز کی وائٹ ہاو¿س کی نمائندہ میری بروس کو خوفناک رپورٹر قرار دیتے ہوئے کہا، میرے خیال میں اے بی سی کو منسوخ کر دینا چاہیے کیونکہ آپ کی رپورٹنگ بہت فرضی اور غلط ہے۔

یہ واقعہ اوول آفس میں ٹرمپ اور سعودی ولی عہد محمد بن سلمان کے درمیان ملاقات کے دوران پیش آیا۔ اے بی سی کے بروس نے ٹرمپ سے پوچھا کہ وہ کانگریس کی منظوری کا انتظار کرنے کے بجائے، بدنام زمانہ جنسی مجرم جیفری ایپسٹین سے متعلق سرکاری دستاویزات ایپسٹین فائلز کو ذاتی طور پر کیوں جاری نہیں کر رہے ہیں۔ ٹرمپ، جو کبھی ایپسٹین کے قریبی دوست تھے، نے فوری طور پر رپورٹر پر حملہ کیا، اور اس سوال کو غیر نظم و ضبط اور خوفناک قرار دیا۔ انہوںنے کہا، تمہاری کمپنی، تمہاری گھٹیا کمپنی، اس فراڈ میں مجرم ہے۔ لوگ تمہاری چالوں سے ہوشیار ہو گئے ہیں۔

صدر نے اے بی سی پر ان کی 97 فیصد منفی کوریج کا الزام لگایا اور نیٹ ورک کو ناقابل اعتماد قرار دیا۔

واضح رہے کہ اس سے قبل ستمبر میں انہوں نے اے بی سی کے ایک پروگرام سے میزبان جمی کامل کو ہٹانے کا مطالبہ کیا تھا۔ کامل نے قدامت پسند کارکن چارلی کرک کے قتل پر تبصرہ کیا۔ تاہم، 2017 میں، ٹرمپ کے پہلے ایف سی سی چیف، اجیت پائی نے این بی سی کے لائسنس کو منسوخ کرنے کے مطالبات کو مسترد کر دیا، یہ دلیل دیتے ہوئے کہ ایجنسی مواد کی بنیاد پر لائسنس منسوخ نہیں کر سکتی۔

ہندوستھان سماچار

ہندوستان سماچار / عطاءاللہ