باکو، 18 نومبر (ہ س)۔ مواصلات اور دیہی ترقی کے مرکزی وزیر مملکت ڈاکٹر چندر شیکھر پیمسانی نے کہا کہ این آر آئیز کی کامیابی ہندوستان کی عالمی امیج کو مضبوط کرتی ہے، ان کی سرمایہ کاری سے نئے مواقع پیدا ہوتے ہیں اور ان کے بچے دونوں ممالک کے درمیان ثقافتی پل کا کام کرتے ہیں۔

ڈاکٹر چندر شیکھر پیمسانی نے باکو، آذربائیجان میں ہندوستانی کمیونٹی سے خطاب کرتے ہوئے ہندوستانی تارکین وطن سے اپیل کی کہ وہ رہنما بنیں، نوجوان صنعت کاروں کی رہنمائی کریں، ہندوستان میں سرمایہ کاری میں اضافہ کریں، اور ملک کی ترقی کے سفر میں فعال شراکت دار بنیں۔ اس تقریب میں ہندوستانی نژاد 1,000 سے زیادہ لوگوں نے شرکت کی، جن میں بین الاقوامی تیل اور گیس، مہمان نوازی، اور اجناس کی تجارت کے شعبوں کے پیشہ ور افراد کے ساتھ ساتھ آذربائیجان کی مختلف یونیورسٹیوں میں زیر تعلیم 380 ہندوستانی طلباء بھی شامل ہیں۔

ڈاکٹر پیمسانی نے ہندوستانی برادری کی یکجہتی اور تنظیمی طاقت کی تعریف کی۔ انہوں نے خاص طور پر انڈین-آذربائیجان ایسوسی ایشن، آذربائیجان-تیلگو ایسوسی ایشن، باکو تمل سنگھم، اور آذربائیجان کی انڈین اسٹوڈنٹس ایسوسی ایشن جیسی تنظیموں کا ذکر کرتے ہوئے کہا کہ ہزاروں کلومیٹر کے فاصلے پر ہونے کے باوجود یہ کمیونٹی ایک جدید، لچکدار، اور جڑوں سے جڑے ہندوستان کو پیش کر رہی ہے۔ ہندوستان کے ڈیجیٹل انقلاب، قابل تجدید توانائی، خلائی پروگرام اور اقتصادی ترقی کا حوالہ دیتے ہوئے، وزیر نے نوجوانوں پر زور دیا کہ وہ اپنی دوہری شناخت کو فخر کے ساتھ قبول کریں اور قدیم ہندوستانی علم کو جدید کثیر الثقافتی نقطہ نظر کے ساتھ مربوط کریں۔

---------------

ہندوستان سماچار / عبدالسلام صدیقی