سری نگر، 15 نومبر (ہ س): ۔جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ نے سری نگر کے نوگام پولیس اسٹیشن میں ہوئے ایک زوردار دھماکے میں جانی نقصان پر غم کا اظہار کیا ہے۔ ایکس پر ایک پوسٹ میں، ایل جی سنہا، نے کہا کہ حکومت مرنے والوں کے خاندانوں، دوستوں اور پیاروں کے ساتھ یکجہتی کے ساتھ کھڑی ہے۔ انہوں نے کہا کہ انتہائی المناک حادثاتی دھماکے کے نتیجے میں قیمتی جانوں کے ضیاع پر گہرا دکھ ہوا ہے۔ غمزدہ خاندانوں سے میری تعزیت ہے۔ میں زخمیوں کی جلد صحت یابی کے لیے دعا گو ہوں، متاثرہ افراد کو ہر ممکن مدد فراہم کی جا رہی ہے۔ میں نے حادثاتی دھماکے کی وجوہات جاننے کے لیے تحقیقات کا حکم دے دیا ہے۔ دریں اثناء وزیر اعلیٰ عمر عبداللہ نے بھی اس المناک حادثاتی دھماکے پر گہرے رنج و غم کا اظہار کیا ہے۔ انہوں نے کہا، میں نے سوگوار خاندانوں سے دلی ہمدردی کا اظہار کیا اور تمام زخمیوں کی جلد صحت یابی کے لیے دعا کی۔ فرید آباد دہشت گردی کے ماڈیول سے پکڑا گیا دھماکہ خیز مواد تھانے کے اندر حادثاتی طور پر پھٹ جانے کے بعد ریاستی تحقیقاتی ایجنسی کے ایک افسر، نائب تحصیلدار اور ایک درزی سمیت کم از کم 9 افراد کی موت ہو گئی، جبکہ 31 دیگر زخمی ہو گئے۔ ہندوستھان سماچار

ہندوستان سماچار / Aftab Ahmad Mir