شملہ، 13 نومبر (ہ س)۔ ہماچل پردیش میں موسم سرما اپنے شباب پر ہے اورسردی نے اس سیزن کا اب تک کا سب سے سرد دور لا دیاہے۔ ریاست کے اونچائی والے قبائلی علاقوں میں درجہ حرارت صفر سے کئی ڈگری تک نیچے چلا گیا ہے۔ لاہول اسپیتی اور کنور اضلاع میں سخت سردی کی وجہ سے پانی کے ذرائع منجمد ہو گئے ہیں۔ جھیلوں، آبشاروں اور دیگر قدرتی آبشاروں کی اوپری پرت برف میں تبدیل ہو گئی ہے۔ کئی جگہوں پر، سڑکوں پر بھی برف جم رہی ہیں، جس سے گاڑیوں کی آمدورفت خطرے میں پڑ گئی ہے۔
محکمہ موسمیات کے مطابق، تابو، لاہول اسپیتی ضلع میں کم از کم درجہ حرارت بدھ کی رات سے جمعرات کی صبح تک مائنس 7.4 ڈگری سیلسیس درج کیا گیا، جس سے یہ موسم کی سرد ترین رات بن گئی۔ تابو فی الحال ریاست کا سرد ترین مقام ہے۔ اسی ضلع میں کوکمسیری اور کیلونگ میں بھی بالترتیب -3.3 اور -3.1 ڈگری سیلسیس کا کم سے کم درجہ حرارت ریکارڈ کیا گیا۔ کنور ضلع کے کلپا میں کم سے کم درجہ حرارت -0.4 ڈگری سیلسیس تک گر گیا۔
ہل اسٹیشن منالی میں کم سے کم درجہ حرارت 2.5 ڈگری سیلسیس تھا۔ میدانی علاقوں میں بھی راتیں ہڈیوں کو کپکپا رہی ہیں۔ ہمیرپور میں کم سے کم درجہ حرارت 5.6 ڈگری سیلسیس ریکارڈ کیا گیا، جو معمول سے چار ڈگری کم ہے۔ دلچسپ بات یہ ہے کہ ہل اسٹیشن شملہ میں راتیں اس وقت بہت سے میدانی علاقوں سے زیادہ گرم ہیں۔ شملہ میں کل رات کم سے کم درجہ حرارت 8.2 ڈگری سیلسیس تھا۔
ریاست کے دیگر شہروں میں کم از کم درجہ حرارت اونا میں 8 ڈگری سیلسیس، سندر نگر میں 4.5، کانگڑا میں 6.5، منڈی میں 6.3، پالم پور میں 5.5، سولن میں 2.6، بھونتر میں 3.5، ناہن میں 9.5، بلاسپور میں 8.5 اور سراہن میں 8 اورکسولی میں 10.9ڈگری سیلسیس درج کیا گیا۔ اوسطاً دیکھا جائے تو ریاست کا کم از کم درجہ حرارت معمول سے دو ڈگری نیچے گر گیا ہے۔
محکمہ موسمیات کے مرکز شملہ کے مطابق ہماچل میں اگلے چھ دنوں تک موسم صاف رہے گا اور کہیں بھی بارش یا برفباری کی توقع نہیں ہے۔ نتیجتاً سردی کی شدت میں اضافہ متوقع ہے۔ زیادہ اونچائی والے علاقوں میں میں کم سے کم درجہ حرارت صفر سے نیچے ہی رہنے کی توقع ہے۔
موسمیاتی مرکز کے سائنسدان شوبھت کٹیار نے بتایا کہ نومبر میں اب تک صرف 1.1 ملی میٹر بارش ریکارڈ کی گئی ہے جو کہ معمول سے 83 فیصد کم ہے۔ اگلے دو ہفتوں تک بارش کی کوئی پیش گوئی نہیں ہے۔ نتیجتاً نومبر ایک خشک مہینہ ہو سکتا ہے۔ پہاڑوں اور میدانی علاقوں میں صبح اور شام کی ٹھنڈی ہواوں نے لوگوں کو سردی کا مکمل احساس دلایا ہے۔ فی الحال، ہماچل پردیش میں صاف دن اور انتہائی سرد راتیں گزر رہی ہیں۔
ہندوستھان سماچار
ہندوستان سماچار / محمد شہزاد
