راجوری میں انتظامیہ نے فضائی سروس کو بحال کیا

جموں، 13 نومبر (ہ س)۔ پہاڑی اور سرحدی ضلع راجوری میں عوامی سہولت کے لیے طویل عرصے سے منتظر ہیلی کاپٹر سروس دوبارہ شروع کر دی گئی ہے، جس سے عوام کو آمد و رفت میں زبردست راحت کے ساتھ ساتھ ہنگامی اور طبی حالات میں فوری مدد کا مؤثر ذریعہ فراہم ہوا ہے۔ یہ سہولت اسپورٹس اسٹیڈیم خیورا کے ہیلی پیڈ سے بحال کی گئی، جو ضلع کے دور افتادہ اور دشوار گزار علاقوں کے لیے رسائی کے نئے امکانات فراہم کرے گی۔ اس موقع پر ڈپٹی کمشنر راجوری ابھشیک شرما نے بحالی تقریب میں شرکت کرتے ہوئے انتظامات اور دستیاب ڈھانچے کا تفصیلی جائزہ لیا۔

ڈپٹی کمشنر نے اپنے خطاب میں کہا کہ ہیلی کاپٹر سروس کی بحالی عام شہریوں کے لیے کسی نعمت سے کم نہیں، خاص طور پر اُن مواقع پر جب طبی ایمرجنسی، حادثات یا دیگر ہنگامی حالات میں بروقت نقل و حمل کی ضرورت پیش آتی ہے۔ انہوں نے کہا کہ بروقت فضائی رابطہ انسانی جانیں بچانے، عوامی مشکلات کم کرنے اور ضلع کی مجموعی آفات سے نمٹنے کی صلاحیت کو مضبوط بنانے میں کلیدی کردار ادا کرے گا۔

ابھشیک شرما نے مزید کہا کہ یہ اقدام راجوری کے دور دراز اور سرحدی علاقوں کو جموں و کشمیر کے دیگر حصوں سے بہتر طور پر جوڑے گا، جس سے عوام کو صحت، انتظامی خدمات اور بنیادی سہولیات تک آسان رسائی حاصل ہوگی۔ اُن کے مطابق “یہ سروس صرف ایک سفری سہولت نہیں بلکہ ضرورت کے وقت عوام کے لیے زندگی کی لکیر ہے۔ہیلی کاپٹر سروس کے بہتر انتظام کے لیے ایڈیشنل ڈسٹرکٹ ڈیولپمنٹ کمشنر راجوری، ملکزادہ شیرازالحق کو نوڈل آفیسر مقرر کیا گیا ہے تاکہ بین المحکماتی رابطہ مؤثر بنایا جا سکے اور ہنگامی معاملات میں فوری کارروائی ممکن ہو۔

ہندوستھان سماچار

---------------

ہندوستان سماچار / محمد اصغر