جموں, 13 نومبر (ہ س)۔ دہلی میں کار دھماکے کے بعد جموں و کشمیر پولیس نے سیکورٹی اقدامات مزید سخت کر دیے ہیں اور عوام سے چوکس رہنے کی اپیل کی ہے۔ تمام اضلاع میں ہائی الرٹ جاری کر دیا گیا ہے جبکہ حساس علاقوں میں نگرانی اور چیکنگ کو مزید بڑھا دیا گیا ہے۔

پولیس نے الرٹ رہنے کے ساتھ ساتھ مقامی لوگوں، دکانداروں اور تاجروں سے متعدد میٹنگیں کیں اور اُن سے اپیل کی کہ کسی بھی مشتبہ سرگرمی کی اطلاع فوراً پولیس کو دیں۔جموں میں پولیس افسران نے تاجروں، ٹرانسپورٹروں اور رہائشیوں کے ساتھ میٹنگیں کر کے اُنہیں مشکوک حرکات یا لاوارث اشیاء کی فوری اطلاع دینے کی ہدایت دی۔ ایک پولیس افسر نے بتایا کہ ہم نے کاروباری طبقے سے رابطہ قائم کر کے کمیونٹی نگرانی کو مضبوط بنایا ہے۔ شہری تعاون امن و امان برقرار رکھنے کے لیے ناگزیر ہے۔

انتظامیہ نے شہریوں اور تاجروں سے کہا ہے کہ وہ اعلیٰ معیار کے سی سی ٹی وی کیمرے نصب کریں تاکہ شہر کے سیکورٹی نیٹ ورک کو مزید مؤثر بنایا جا سکے۔ اہم مقامات پر مسلسل گشت اور ویڈیو نگرانی جاری ہے۔ پولیس افسر نے کہا کہ عوام ہماری آنکھیں اور کان بن سکتے ہیں تاکہ کسی بھی ناخوشگوار واقعے کو روکا جا سکے۔جموں بس اسٹینڈ، ریلوے اسٹیشن اور بڑی مارکیٹوں میں چیکنگ سخت کر دی گئی ہے۔ فوری ردعمل ٹیمیں تعینات کر دی گئی ہیں جبکہ حساس مقامات پر اضافی اہلکار بھی لگائے گئے ہیں۔ پولیس نے کہا کہ عوام کو گھبرانے کی ضرورت نہیں لیکن چوکس رہنا ضروری ہے، کیونکہ پولیس ہر ممکن صورتحال سے نمٹنے کے لیے تیار ہے۔

حکام کے مطابق سیکورٹی کا دائرہ سانبہ اور کٹھوعہ اضلاع تک بڑھایا گیا ہے جبکہ ماتا ویشنو دیوی مندر اور کٹرا بیس کیمپ پر بھی اضافی فورس تعینات کر دی گئی ہے۔ جموں سرینگر نیشنل ہائی وے اور ریلوے ٹریکس پر بھی گشت میں اضافہ کیا گیا ہے۔

ہندوستھان سماچار

---------------

ہندوستان سماچار / محمد اصغر