ریوا، 10 نومبر (ہ س)۔ مدھیہ پردیش کے ریوا ضلع میں گڑھ تھانہ کے علاقے میں ریوا-پرایاگ راج روڈ پر اتوار کی شام ایک تیز رفتار اسکارپیو نے سڑک عبور کر رہے لوگوں کو کچل دیا۔ اس حادثے میں دو بچوں سمیت چار افراد کی موت ہو گئی، جبکہ دو افراد شدید زخمی ہوگئے، جنہیں قریبی اسپتال میں داخل کرایا گیا ہے۔ پولیس حادثے کی تحقیقات میں مصروف ہے۔

معلومات کے مطابق، ریوا-پرایاگ راج روڈ پر گاوں تیندوا کوٹھار کے نزدیک کچھ لوگ پیدل سڑک پار کر رہے تھے اور ایک شخص بائیک پر جا رہا تھا۔ اسی دوران تیز رفتار اسکارپیو نے انہیں زور دار ٹکر مار دی۔ اس حادثے میں چاروں افراد موقع پر ہی جان کی بازی ہار گئے۔ حادثے کے بعد تین لاشیں کافی دیر تک سڑک پر پڑی رہیں۔ واقعے سے برہم مقامی لوگوں نے شدید ہنگامہ کیا۔ اطلاع ملتے ہی گڑھ اور منگواں تھانہ پولیس موقع پر پہنچی اور زخمیوں کو اسپتال پہنچایا۔ پولیس نے لاشوں کو پوسٹ مارٹم کے لیے بھیج کر معاملے کی تحقیقات شروع کر دی ہیں۔

حادثے کے بعد غصے میں آئے اہل خانہ نے اتوار کی رات ایک بار پھر 45 منٹ تک ٹریفک جام کر دیا۔ اطلاع ملنے پر ایس ڈی ایم سنجے جین، ڈی ایس پی پرتیبھا شرما، سوہاگی تھانہ انچار پون شکلا سمیت پورا پولیس عملہ موقع پر پہنچا۔ ٹریفک کھلوانے میں پولیس اور انتظامیہ کو کافی مشقت اٹھانی پڑی۔ حادثے میں زخمیوں کی حالت جاننے کے لیے کلکٹر پرتیبھا پال، کمشنر بی ایس جامود اور ایس پی شیلندر سنگھ اسپتال پہنچے۔

پولیس کے مطابق، ہلاک ہونے والوں کی شناخت رام نریش ساکیت (35) ولد رامسیا ساکیت ساکن گاوں تیندوا کوٹھار، روچی ساکیت (12) بیٹی رام نریش ساکیت ساکن گاوں تیندوا کوٹھار، رچنا ساکیت (13) بیٹی کانہیا ساکیت ساکن گاوں تیندوا کوٹھار اور کملیش سنگھ (35) ولد رامسیا سنگھ ساکن گاوں ہرو کے طور پر ہوئی ہے۔ حادثے میں سلیکھا ساکیت بیٹی منی لال ساکیت اور سومیا ساکیت بیٹی منی لال ساکیت زخمی ہوئی ہیں۔

اسکارپیو چھتیس گڑھ کے درگ ضلع کی ہے۔ اسکارپیو کے مالک، بھلائی سیکٹر-10 کے رہائشی برجندرا سنگھ نے بتایا کہ گاڑی ان کا سالا چلا رہا تھا۔ ساتھ میں ان کے ساڑھو کا بیٹا بھی تھا۔ حادثے میں دونوں محفوظ ہیں۔ ایئر بیگ کھلنے کی وجہ سے ان کی جان بچ گئی۔ دونوں اتوار کو کانپور کے لیے نکلے تھے۔ کانپور میں برجندر سنگھ کے ساڑھو کو آئی سی یو میں داخل کرایا گیا ہے۔

ایس ڈی ایم سنجے جین نے بتایا کہ یہ واقعہ انتہائی افسوسناک ہے۔ خاندان میں کئی افراد کی موت کی وجہ سے اہل خانہ میں شدید غصہ ہے۔ ڈی ایس پی پرتیبھا شرما نے بتایا کہ اہل خانہ اس افسوسناک واقعے سے بہت صدمے میں ہیں، اسی وجہ سے انہوں نے دو بار ٹریفک جام کیا۔ کلکٹر نے متاثرہ خاندان کے لیے 50-50 ہزار روپے کی مالی امداد ریڈ کراس کے ذریعے فراہم کرائی ہے۔

ہندوستھان سماچار

---------------

ہندوستان سماچار / انظر حسن