نئی دہلی، 10 نومبر (ہ س)۔ دہلی کی راوس ایونیو کورٹ نے لینڈ فار جاب معاملے میں مرکزی تفتیشی بیورو (سی بی آئی) کی طرف سے دائر کی گئی ایف آئی آر میں ملزمین کے خلاف الزامات طے کرنے کے معاملے پر اپنا فیصلہ ملتوی کر دیا ہے۔ الزامات طے کرنے کا فیصلہ تیار نہیں ہونے کی وجہ سے اسپیشل جج وشال گوگنے نے فیصلہ 4 دسمبر کو سنانے کا حکم دیا۔

عدالت نے 25 اگست کو سی بی آئی کے معاملے میں الزامات طے کرنے پر اپنا فیصلہ محفوظ رکھ لیا تھا۔ پیر کی سماعت کے دوران سابق مرکزی وزیر لالو پرساد یادو، بہار کی سابق وزیر اعلیٰ رابڑی دیوی اور تیجسوی یادو پیش نہیں ہوئے۔ تینوں کی جانب سے وکیل منیندر سنگھ نے تینوں کی عدالت میں حاضری سے استثنیٰ کی درخواست کی جسے عدالت نے منظور کر لیا۔ لالو یادو نے اس معاملے میں سی بی آئی کی جانب سے درج ایف آئی آر کو منسوخ کرنے اور ٹرائل کورٹ میں چل رہی کاروائی پر روک لگانے کی درخواست کے لئے دہلی ہائی کورٹ میں درخواست دائر کی ہے۔

لالو یادو کے وکیل کپل سبل نے کہا کہ اس معاملے میں مقدمہ چلانے کے لیے ضروری اجازت نہیں لی گئی ۔ ایسے میں پوری تفتیش غیر قانونی ہے۔ ضروری اجازت کے بغیر تفتیش شروع نہیں کی جا سکتی۔ سبل نے کہا کہ اس معاملے میں پوری کارروائی غلط ہے۔ سماعت کے دوران سی بی آئی کی طرف سے پیش ہونے والے وکیل نے کہا کہ لالو یادو جان بوجھ کر ٹرائل کورٹ میں الزامات طے کرنے پر دلائل پیش نہیں کر رہے ہیں۔ ٹرائل کورٹ میں اس کیس میں دلائل 9 ستمبر کو ختم ہوں گے۔ تب عدالت نے کہا کہ ضروری اجازت کا معاملہ صرف بدعنوانی کی روک تھام کے قانون سے متعلق معاملات میں ہی ہوگا نہ کہ تعزیرات ہند سے متعلق معاملات میں۔

سپریم کورٹ نے 18 جولائی کو ٹرائل کورٹ کی کارروائی پر روک لگانے سے انکار کر دیا تھا۔ 7 اکتوبر 2022 کو لینڈ فار جاب معاملے میں سی بی آئی نے لالو پرساد یادو، رابڑی دیوی اور میسا بھارتی سمیت 16 ملزمین کے خلاف چارج شیٹ داخل کی تھی۔ٹرائل کورٹ نے 25 فروری کو سی بی آئی کی چارج شیٹ کا نوٹس لیا تھا۔ سی بی آئی نے 7 جون 2024 کو اس معاملے میں حتمی چارج شیٹ داخل کی تھی، جس میں 78 لوگوں کو ملزم نامزد کیا گیا ہے۔ ان 78 ملزمین میں 38 ریلوے نوکری کے امیدوار شامل ہیں۔

ہندوستھان سماچار

ہندوستان سماچار / محمد شہزاد