بہار میں ہر گھر کے ایک رکن کو ملے گی سرکاری ملازمت : تیجسوی یادوپٹنہ، 8 اکتوبر (ہ س)۔ بہار اسمبلی انتخاب کے پیش نظر آر جے ڈی لیڈر اور سابق نائب وزیر اعلیٰ تیجسوی یادو نے ایک بڑا اعلان کر برسراقتدار حلقے میں ہلچل پیدا کر دی ہے۔ انہوں نے وعدہ کیا ہے کہ عظیم اتحاد کی حکومت بننے کے بعد بہار کے ہر اُس کنبہ کے ایک ملازم کو سرکاری ملازمت دی جائے گی، جس کنبہ میں کوئی سرکاری ملازم نہیں ہے۔ اس کے لیے تیجسوی یادو نے نیا قانون بنا کر راہ ہموار کرنے کی بات کہی ہے۔ تیجسوی کا کہنا ہے کہ حکومت بننے کے 20 دنوں کے اندر ہی ایکٹ بنا کر 20 مہینوں میں اپنا وعدہ پورا کریں گے۔ یعنی عظیم اتحاد کی حکومت بننے کے 2 برسوں کے اندر ہر گھر میں کم از کم ایک سرکاری ملازم ضرور ہوگا۔تیجسوی یادو نے برسراقتدار اتحاد پر عظیم اتحاد کے اعلانات کی نقل کرنے کا الزام بھی عائد کیا اور کہا کہ آر جے ڈی کا ویژن بہت صاف ہے، پارٹی کو معلوم ہے کہ ریاست سے بے روزگاری کس طرح دور کرنی ہے۔ انہوں نے کہا کہ ’’ایسا کوئی گھر نہیں بچے گا جس کے پاس سرکاری ملازمت نہیں ہوگی۔ حکومت بنتے ہی 20 مہینے کے اندر ملازمت دینے کا کام کریں گے۔‘‘ انہوں نے مزید کہا کہ ’’بی جے پی نے 20 برسوں تک کوئی ملازمت نہیں دی ہے۔ ہم 20 دنوں میں اس سے متعلق قانون بنائیں گے۔‘‘تیجسوی یادو نے کہا کہ 2020 میں ہم نے اعلان کیا تھا کہ حکومت بنتے ہی 10 لاکھ لوگوں کو ملازمت دیں گے۔ موجودہ وزیر اعلیٰ نے اُس وقت سوال کیا تھا کہ یہ ممکن ہے کیا؟ اس کے لیے پیسہ کہاں سے آئے گا؟ اپنے باپ کے پاس سے لائے گا کیا؟ پھر حکومت بننے کے 2 سال بعد بھی کسی کو ملازمت یا روزگار نہیں ملا۔ 20 سال سے حکومت سے ملازمت اور بے روزگاری پر تبادلہ خیال تک نہیں کیا ہے۔تیجسوی یادو نے بہار کے ہر گھر میں ایک سرکاری ملازم کو یقینی بنانے کا وعدہ کرنے کے ساتھ ساتھ کہا کہ یہ ’’آخری اعلان نہیں ہے۔ بہار میں اب نوکری کی بَہار آئے گی۔ سماجی انصاف کے ساتھ بہار میں معاشی انصاف ہوگا۔ آر جے ڈی جو بولتی ہے، وہ کرتی ہے۔ بہار اب بدنام نہیں ہوگا۔‘‘ تیجسوی نے این ڈی اے کو ہدف تنقید بناتے ہوئے کہا کہ برسراقتدار اتحاد نے 20 برسوں میں لوگوں کو محض سیکورٹی اور بے روزگاری کا خوف دیا ہے۔ اب اس خوف کو ختم کیا جائے گا۔ہندوستھان سماچار

ہندوستان سماچار / Mohammad Afzal Hassan