واشنگٹن، 8 اکتوبر (ہ س)۔ امریکی حکومت کے شٹ ڈاون کا وفاقی ملازمین کی تنخواہوں پر اثر پڑ سکتا ہے۔ اس بات کے قوی امکان ہیں کہ یہ ملازمین اپنی تنخواہ سے محروم ہوجائیں ۔ وائٹ ہاو¿س نے اشارہ دیا ہے کہ وہ چھٹی پر گئے وفاقی ملازمین کو ان کی پچھلی تنخواہ ادا کرنے سے انکار کر سکتا ہے۔

سرکاری شٹ ڈاون کے نتیجے میں پیدا ہونے والی صورتحال پر تقریباً تمام بڑے امریکی خبر رساں اداروں میں بحث کی گئی ہے۔ آن لائن نیوز پورٹل پولیٹیکو کی رپورٹ کے مطابق ،یونین کے رہنماوں اور ڈیموکریٹک ممبران پارلیمنٹ نے کہا ہے کہ یہ اقدام صدر ڈونلڈ ٹرمپ کی پہلی مدت کے دوران منظور ہونے والی قانون کے خلاف ہوگا۔ وائٹ ہاوس نے کہا ہے کہ برخاست کیے گئے وفاقی ملازمین کے تنخواہ نہیں ملنے کا امکان ہے۔

صدر ڈونلڈ ٹرمپ نے منگل کے روز اوول آفس میں کہا کہ انتظامیہ کو سب کی فکر ہے لیکن کچھ لوگ ایسے بھی ہیں جو دیکھ بھال کے مستحق نہیں ہیں۔ ایکسیوس نے سب سے پہلے وائٹ ہاوس کے سخت موقف کی اطلاع دی، جس کے بعد سے سیاسی ہلچل مچ گئی۔ وائٹ ہاوس اور آفس آف مینجمنٹ اینڈ بجٹ کے انتظامیہ کے حکام نے اس بات کو تسلیم کیا، لیکن اس معاملے پر عوامی طور پر تبصرہ کرنے سے انکار کر دیا۔

ٹرمپ نے کہا کہ ڈیموکریٹس نے بہت سے لوگوں کو خطرے اور پریشانی میں ڈال دیا ہے۔ یہ بات قابل غور ہے کہ اپنی پہلی مدت کے دوران، ٹرمپ نے 35 دن سے زیادہ جاری رہنے والے شٹ ڈاون کے بعد ایک ایگزیکٹو آرڈر پر دستخط کیے تھے۔ یہ آرڈر گزشتہ تنخواہ کی ادائیگی کی ضمانت دیتا ہے۔ تاہم، تازہ ترین اقدام نے 750,000 وفاقی ملازمین کے لیے تنخواہوں کا بحران پیدا کر دیا ہے۔

اسپیکر مائیک جانسن کا کہنا ہے کہ انہوں نے 2019 کے قانون کے حق میں ووٹ دیا ہے جس میں تنخواہ کی واپسی کی ضمانت ہے۔ جانسن نے منگل کو صحافیوں کو بتایا کہ وائٹ ہاوس کے تازہ حکم نامے پر بحث کی جائے گی۔ توقع ہے کہ چھٹی والے ملازمین کو تنخواہ واپس مل جائے گی۔ کچھ قانونی تجزیہ کاروں کا خیال ہے کہ حکومت کو ایسا نہیں کرنا چاہیے اور ڈیموکریٹس کو اس پر فوری طور پر سخت موقف اختیار کرنا چاہیے۔

دریں اثنا، وائٹ ہاوس نے 2024 کے انتخابات میں ٹرمپ کے خلاف ووٹ دینے والی ریاستوں کیلیفورنیا، نیویارک اور نیو جرسی کے لیے توانائی اور بنیادی ڈھانچے کی فنڈنگ معطل کر دی ہے۔ نائب صدر جے ڈی وینس نے کہا ہے کہ شٹ ڈاون سے متعلق کسی بھی ملازمت میں کمی کے ذمہ دار ڈیموکریٹس ہوں گے۔

سی این بی سی نے رپورٹ کیا کہ ڈونلڈ ٹرمپ نے یہ بھی اشارہ کیا کہ سرکاری شٹ ڈاون کے دوران فارغ کیے گئے کچھ وفاقی ملازمین کو کام پر واپس آنے کے بعد بھی تنخواہ واپس نہیں ملے گی۔ وائٹ ہاوس کے ایک مسودہ میمورینڈم میں واضح کیا گیا ہے کہ بغیر تنخواہ کی چھٹی پربھیجے جانے والے وفاقی ملازمین کو تنخواہ کی واپسی کی ضمانت نہیں ہے۔ بحران سے نمٹنے کے لیے کانگریس کو خاص طور پر فنڈز فراہم کرنے چاہئیں۔

جب ٹرمپ سے منگل کی سہ پہر وائٹ ہاوس میں ان ملازمین کو واجب الادا تنخواہ کے بارے میں پوچھا گیا تو انہوں نے کہا، ”میں کہوں گا کہ یہ اس پر منحصر ہے کہ ہم کس کے بارے میں بات کر رہے ہیں۔“

سی این این کی خبر کے مطابق، فیڈرل ایوی ایشن ایڈمنسٹریشن نے عملے کی کمی کی وجہ سے منگل کی رات نیش ول انٹرنیشنل ایئرپورٹ کے لیے پروازیں عارضی طور پر روک دیں۔ ہوائی اڈے نے مشرقی وقت کے مطابق صبح ایک بجے تک پروازوں کی معطلی کی اطلاع دی۔

ہندوستھان سماچار

ہندوستان سماچار / محمد شہزاد