جے پور، 8 اکتوبر (ہ س)۔ منگل کی دیر رات، سیکر ضلع کے سری مادھوپور ریلوے اسٹیشن کے قریب مال بردار ٹرین کی 38 ویگنیں پٹری سے اتر گئیں۔ پھولیرا سے ریواڑی جانے والی ٹرین میں چاول لدے ہوئے تھے۔ حادثے کے بعد ریل ٹریفک مکمل طور پر متاثر ہو گئی ہے۔ ریلوے ملازمین ٹریفک کی بحالی کے لیے کام کر رہے ہیں۔

نارتھ ویسٹرن ریلوے کے جے پور ڈویژنل ریلوے مینیجر روی جین نے بتایا کہ یہ واقعہ سری مادھوپور ریلوے اسٹیشن کے قریب بی کیبن ایریا میں پیش آیا۔ منگل کی دیر رات، جب پھولیرا سے ریواڑی جانے والی مال بردار ٹرین کو مین لائن سے لوپ لائن کی طرف موڑا جا رہا تھا، اچانک ایک بوگی پٹری سے اتر گئی، جس کی وجہ سے اس کے پیچھے لگ بھگ اڑتیس بوگیاں یکے بعد دیگرے پٹری سے اتر گئیں۔

حادثے کی اطلاع ملتے ہی ریلوے کے اعلیٰ حکام اور تکنیکی ٹیم جائے وقوعہ پر پہنچی۔ ریلوے ملازمین نے کرینوں اور بھاری مشینری کا استعمال کرتے ہوئے پٹری سے اترنے والی بوگیوں کو ہٹانے کی کوشش کی۔ کسی جانی یا مالی نقصان کی کوئی اطلاع نہیں ہے۔ ریلوے نے تحقیقات کا حکم دے دیا ہے۔

اس حادثے کی وجہ سے رینگاس-سری مادھوپور کوریڈور پر ریل کی آمدورفت مکمل طور پر درہم برہم ہوگئی ہے۔ کئی ٹرینوں کو روک دیا گیا ہے اور کچھ کو متبادل راستوں کی طرف موڑ دیا گیا ہے۔ حادثہ ایک مال بردار ٹریک پر پیش آیا جو مسافر ٹرین کی پٹری سے الگ ہے۔ اس لیے کوئی مسافر ٹرین متاثر نہیں ہوئی۔

قابل ذکر ہے کہ راجستھان میں گزشتہ 24 گھنٹوں میں یہ دوسری مال بردار ٹرین کے پٹری سے اترنے کا واقعہ ہے۔ بیکانیر سے جیسلمیر جانے والی مال بردار ٹرین منگل کی صبح تقریباً سات بجے بیکانیر ڈویژن کے گجنیر-کولیات اسٹیشنوں کے درمیان پٹری سے اتر گئی تھی۔ واقعے کے بعد دو ٹرینیں منسوخ کردی گئیں۔

---------------

ہندوستان سماچار / عبدالسلام صدیقی