پٹنہ، 6 اکتوبر (ہ س)۔ بہار کے وزیر اعلی نتیش کمار نے آج ایک انے مارگ واقع ’’سنکلپ‘‘ سے ’’ وزیر اعلیٰ خاتون روزگار منصوبہ ‘‘ کے تحت 21 لاکھ خواتین استفادہ کنندگان کے کھاتے میں 10 ہزار روپے کی شرح سے 2100 کروڑ روپے منتقل کئے۔

پروگرام کے دوران وزیر اعلیٰ نے کہا کہ ’’وزیراعلیٰ خاتون روزگار منصوبہ ‘‘ کا بنیادی مقصد ریاست کے ہر خاندان کی ایک خاتون کو اپنی پسند کا کیریئر شروع کرنے کے لیے مالی مدد فراہم کرنا ہے۔10,000 (دس ہزار روپے) کی ابتدائی مالی امداد فراہم کی جائے گی۔ خواتین کے اپنے کام شروع کرنے کے بعد2 لاکھ تک کی اضافی مالی امداد فراہم کی جائے گی۔

انہوں نے کہا کہ انہیں یقین ہے کہ اس اسکیم کے نفاذ سے نہ صرف خواتین کی پوزیشن مستحکم ہوگی بلکہ انہیں ریاست کے اندر روزگار کے بہتر مواقع بھی فراہم ہوں گے۔ خواتین خود کفیل ہو جائیں گی۔ خود انحصاری اور خود کفالت پر مرکوز یہ اسکیم ریاست اور ملک کی اقتصادی ترقی کو فروغ دے گی۔

قابل ذکر ہے کہ وزیر اعظم نریندر مودی نے 26 ستمبر 2025 کو وزیر اعلیٰ نتیش کمار کی موجودگی میں وزیر اعلیٰ خاتون روزگار منصوبہ کا آغاز کیا تھا۔ اس منصوبہ کے تحت ریاست کی 75لاکھ خواتین استفادہ کنندگان کو 7,500 کروڑ کی رقم براہ راست بینیفٹ ٹرانسفر (ڈی بی ٹی) کے ذریعے 10,000 فی مستفید کی شرح سے منتقل کی گئی۔ اس کے بعد 3 اکتوبر کو وزیر اعلیٰ نے ڈی بی ٹی کے ذریعے25اکھ خواتین استفادہ کنندگان کو 10,000 روپے فی مستفید کی شرح سے 2500 کروڑ روپے تقسیم کئے۔

آج کے پروگرام کے دوران وزیر اعلیٰ نے21لاکھ خواتین مستفیدین کو 10,000 روپے فی مستفید کی شرح سے 2,100 کروڑ روپے منتقل کئے۔ اب تک کل ایک کروڑ 21لاکھ خواتین استفادہ کنندگان کے کھاتوں میں کل 10,000 کروڑ روپے منتقل کیے جا چکے ہیں۔

اس موقع پر’’وزیر اعلیٰ خاتون روزگار منصوبہ ‘‘ پر مبنی ایک مختصر فلم پیش کی گئی۔

ہندوستھان سماچار

ہندوستان سماچار / Mohammad Afzal Hassan