نائب صدرجمہوریہ نے وارانسی میں 10 منزلہ نٹوکوٹائی دھرم شالا کا افتتاح کیا۔

وارانسی، 31 اکتوبر (ہ س)۔ نائب صدر سی پی رادھا کرشنن نے اتر پردیش کے وزیر اعلی یوگی آدتیہ ناتھ کے ساتھ جمعہ کی شام وارانسی میں سری کاشی ناٹوکوٹائی نگر کھیترام مینیجنگ سوسائٹی کے ذریعہ تعمیر کردہ 10 منزلہ نٹو کوٹائی دھرم شالا کا مشترکہ طور پر افتتاح کیا۔ دھرم شالا کی افتتاحی تقریب سے خطاب کرتے ہوئے نائب صدر رادھا کرشنن نے عمارت کا افتتاح کرنے کے موقع پر اپنی مسرت کا اظہار کیا۔ انہوں نے بتایا کہ 25 سال قبل جب وہ پہلی بار کاشی گئے تھے تو وہ ایک نان ویجیٹیرین تھے لیکن گنگا میں نہانے کے بعد انہوں نے سبزی خور طرز زندگی اپنایا۔ انہوں نے کہا، مذہب کو عارضی بحرانوں کا سامنا کرنا پڑتا ہے، لیکن وہ مستقل نہیں ہوتے۔ یہ عمارت اس بات کا ثبوت ہے کہ تمام تر مشکلات کے باوجود بالآخر مذہب کی فتح ہوتی ہے۔ تقریب میں نائب صدر کا خیرمقدم کرتے ہوئے وزیر اعلیٰ یوگی آدتیہ ناتھ نے کہا کہ وزیر اعظم نریندر مودی کی قیادت میں کاشی مسلسل ترقی کی نئی جہتیں قائم کر رہا ہے۔ انہوں نے نوٹ کیا کہ شری کاشی وشوناتھ دھام کے افتتاح کے بعد، ہندوستان اور بیرون ملک سے آنے والے عقیدت مندوں کی تعداد میں نمایاں اضافہ ہوا ہے، جن میں جنوبی ہندوستان اور خاص طور پر تمل ناڈو سے بڑی تعداد شامل ہے۔ وزیر اعلیٰ نے کہا کہ رامیشورم دھام میں بھگوان شری رام کے ذریعہ قائم کردہ مقدس جیوترلنگا اور کاشی میں واقع لارڈ آدی وشویشور ایک دوسرے کی تکمیل کرتے ہیں اور یہ دونوں بھگوان شیو کے خدائی مظہر ہیں۔ انہوں نے نشاندہی کی کہ کاشی کو اب تک 51,000 کروڑ روپے سے زیادہ کے پروجیکٹ ملے ہیں جن میں سے 36,000 کروڑ روپے کے پروجیکٹ مکمل ہوچکے ہیں۔ وزیر اعلیٰ یوگی آدتیہ ناتھ نے کہا کہ اب عقیدت کے ساتھ ساتھ کاشی میں بھی ترقی ہو رہی ہے۔ قبل ازیں وزیر اعلیٰ یوگی آدتیہ ناتھ نے بابت پور کے لال بہادر شاستری بین الاقوامی ہوائی اڈے پر نائب صدر جمہوریہ کا پھولوں کے گلدستے کے ساتھ استقبال کیا۔ قابل ذکر ہے کہ تمل ناڈو کی ناگرتھر برادری کے عطیات سے بنی یہ دھرم شالہ پوروانچل کی سب سے بڑی دھرم شالوں میں شمار ہوتی ہے۔ تقریباً 60 کروڑ روپے کی لاگت سے تعمیر کی گئی اس عمارت میں 140 ایئر کنڈیشنڈ کمرے ہیں، جن میں سے ہر ایک میں تین عقیدت مندوں کی رہائش ہے۔ عقیدت مندوں کے لیے جدید سہولیات سے آراستہ سویٹ روم بھی دستیاب ہوں گے۔ احاطے میں 174 کاروں کے لیے پارکنگ بھی تیار کی گئی ہے۔ قابل ذکر ہے کہ ناٹوکوٹائی نگر کھیترام گزشتہ 240 سالوں سے سری کاشی وشوناتھ مندر کو روزانہ منگلا، بھوگا اور شرینگار آرتی کے لیے سامان بھیج رہا ہے۔

---------------

ہندوستان سماچار / عبدالسلام صدیقی