جامع مسجد کے شاہی امام سید احمد بخاری کی اہلیہ محترمہ نیئر بخاری کو آج جامع مسجد کے عقب میں واقع جنت نشان میں سپرد خاک کر دیا گیا۔ کل رات دل کا دورہ پڑنے سے ان کا انتقال ہو گیا تھا۔

جامع مسجد کے ترجمان کے مطابق رات کے کھانے کے بعد ان کی طبیعت بگڑ گئی اور انہیں انصاری روڈ پر واقع سنجیون اسپتال لے جایا گیا جہاں ڈاکٹروں نے انہیں مردہ قرار دے دیا۔ تاہم نائب شاہی امام سید شعبان بخاری اور ان کی بہنیں انہیں یقین دہانی کے لیے اپولو اسپتال لے گئے جہاں ڈاکٹروں نے بھی انہیں مردہ قرار دے دیا۔

جامع مسجد کے ترجمان کے مطابق ان کی نماز جنازہ آج شام 4:30 بجے جامع مسجد میں ادا کی گئی اور بعد ازاں انہیں جامع مسجد کے عقب میں واقع جنت نشان کے خاندانی قبرستان میں سپرد خاک کر دیا گیا۔ اس موقع پر دہلی کے لیفٹیننٹ گورنر وی کے سکسینہ، دہلی پردیش کانگریس کمیٹی کے سابق صدر اور سابق ایم پی جئے پرکاش اگروال، سابق ایم ایل اے شعیب اقبال، سابق ایم پی میم افضل شاہی امام کے داماد اور سابق ایم ایل اے عمر علی خان، ایم ایل اے آشو ملک، جمعیت اہل حدیث کے امیر مولانا اصغر علی امام مہدی سلفی ، مجلس مشاورت نوید حامد، سماجی کارکن حافظ جاوید، ضلع چاندنی چوک کانگریس کے صدر جاوید مرزا، بازار مٹیا محل تاجر ایسوسی ایشن کے صدر حاجی سلیم الدین، آدم رحمن وغیرہ نے شاہی امام سے ملاقات کر کے تعزیت کا اظہار کیا۔

ہندوستھان سماچار

ہندوستان سماچار / Md Owais Owais