جموں, 29 اکتوبر (ہ س)۔

ضلع ڈوڈہ کے مختلف تعلیمی اداروں سے تعلق رکھنے والے ہنر مند طلباء کے ایک گروپ کو ڈویژنل سطح کے کلا اتسو میں شرکت کے لیے آج ڈپٹی کمشنر ڈوڈہ ہرویندر سنگھ نے ہری جھنڈی دکھا کر روانہ کیا۔ اس موقع پر چیف ایجوکیشن آفیسر ڈوڈہ سمیت محکمہ تعلیم کے دیگر افسران بھی موجود تھے۔

یہ طلباء ضلع بھر میں منعقدہ مختلف ثقافتی و تعلیمی مقابلوں میں نمایاں کارکردگی دکھانے کے بعد منتخب کیے گئے ہیں۔ وہ جموں میں منعقد ہونے والے ڈویژنل سطح کے پروگرام میں موسیقی، کہانی نویسی، تقریر، رقص اور دیگر روایتی فنون میں اپنی صلاحیتوں کا مظاہرہ کریں گے۔

ڈپٹی کمشنر ہرویندر سنگھ نے بتایا کہ 26 طلباء پر مشتمل یہ گروپ مختلف تعلیمی زونز سے ان کی کارکردگی کی بنیاد پر منتخب کیا گیا ہے۔ انہوں نے امید ظاہر کی کہ یہ بچے کلا اتسو میں اپنی بہترین کارکردگی سے ضلع کا نام روشن کریں گے۔

ڈی سی نے کہا کہ گزشتہ برس بھی ڈوڈہ کے طلباء نے قومی سطح پر اپنی صلاحیتوں کا لوہا منوایا تھا۔ یہاں کے بچوں میں بے پناہ ہنر موجود ہے اور حکومت انہیں ایسا پلیٹ فارم فراہم کر رہی ہے جہاں وہ اپنے فن کو نہ صرف نکھار سکیں بلکہ اسے اپنے مستقبل کی بنیاد بنا سکیں۔

ہندوستھان سماچار

---------------

ہندوستان سماچار / محمد اصغر