شاہین آفریدی بنے پاکستان کے نئے ون ڈے کپتان، رضوان کی چھٹی

نئی دہلی، 21 اکتوبر (ہ س)۔ پاکستان کرکٹ بورڈ (پی سی بی) نے پیر کو بڑا فیصلہ کرتے ہوئے محمد رضوان کو ون ڈے ٹیم کی کپتانی سے ہٹا دیا ہے اور تیز گیندباز شاہین شاہ آفریدی کو نیا کپتان مقرر کیا ہے۔ یہ اعلان راولپنڈی میں جنوبی افریقہ کے خلاف جاری ٹیسٹ میچ کے پہلے دن کے بعد کیا گیا۔ اس میچ میں رضوان (33) اور آفریدی (25) دونوں کھیل رہے ہیں۔

پی سی بی کی جانب سے جاری بیان میں رضوان کا نام تک نہیں لیا گیا اور ان کے ہٹائے جانے کی کوئی سرکاری وجہ نہیں بتائی گئی۔ بورڈ نے صرف اتنا کہا کہ یہ فیصلہ اسلام آباد میں سلیکشن کمیٹی اور ٹیم کے وائٹ بال کوچ مائیک ہیسن کے درمیان ہونے والی ملاقات کے بعد لیا گیا۔ دراصل پچھلے ہفتے پی سی بی نے ایک بیان میں واضح طور پر نہیں کہا تھا کہ رضوان جنوبی افریقہ دورے کی ون ڈے سیریز میں کپتان رہیں گے۔ اس کے بجائے بورڈ نے بتایا تھا کہ ہیسن نے پی سی بی چیئرمین محسن نقوی سے ملاقات طلب کر کے نیا کپتان منتخب کرنے کی درخواست کی ہے۔

ذرائع کے مطابق یہ فیصلہ صرف کوچ کی سفارش پر نہیں بلکہ بورڈ کے اعلیٰ سطح پر بھی وسیع حمایت کے ساتھ لیا گیا ہے۔ شاہین آفریدی اس سے پہلے جنوری 2024 میں نیوزی لینڈ کے خلاف ٹی20 سیریز میں کپتان بنے تھے، لیکن ان کا وہ دور کامیاب نہیں رہا۔ پاکستان کو اس سیریز میں 1-4 سے شکست کا سامنا کرنا پڑا اور بعد میں انہیں کپتانی سے ہٹا دیا گیا۔ تب بابر اعظم نے دوبارہ ٹی20 ٹیم کی قیادت سنبھالی تھی۔

پاکستان فی الحال تینوں فارمیٹس میں الگ الگ کپتانوں کی پالیسی پر قائم ہے۔ رضوان کو پچھلے سال ون ڈے ٹیم کا کپتان بنایا گیا تھا۔ ان کی قیادت میں پاکستان نے آسٹریلیا اور جنوبی افریقہ میں سیریز جیتی تھیں، لیکن اس سال کارکردگی میں کمی آئی، خاص طور پر گھریلو چیمپیئنز ٹرافی کے پہلے راونڈ میں شرمناک طور پر باہر ہونے کے بعد۔

حالانکہ رضوان کی ذاتی کارکردگی اطمینان بخش رہی ہے۔ وہ پاکستان کے سرفہرست اسکوررز میں شامل ہیں اور اوسطاً 42 کے قریب رن بنا رہے ہیں۔

دوسری جانب، شاہین آفریدی شاندار فارم میں ہیں۔ پچھلے سال وہ پاکستان کے سب سے زیادہ وکٹ لینے والے گیندباز رہے۔ جنوبی افریقہ اور آسٹریلیا میں سیریز جیت میں ان کا اہم کردار رہا۔ 2023 کے ورلڈ کپ کے بعد سے کسی بھی فل ممبر ملک کا کوئی تیز گیندباز ان کے 45 وکٹوں کے اعداد و شمار کے قریب نہیں پہنچا ہے۔

شاہین آفریدی کی کپتانی میں پاکستان کی پہلی ون ڈے سیریز اگلے ماہ فیصل آباد میں جنوبی افریقہ کے خلاف تین میچوں کی سیریز ہوگی۔

ہندوستھان سماچار

---------------

ہندوستان سماچار / انظر حسن