سابق وزیر خزانہ مہادیو شیونکر کا انتقال، مہاراشٹر نے ایک تجربہ کار رہنما کھو دیا

گونڈیا ، 20 اکتوبر(ہ س)۔ مہاراشٹر کے سابق وزیر خزانہ اور آبپاشی کے وزیر،

سینئر بی جے پی لیڈر مہادیو راؤ شیونکر آج طویل علالت کے بعد اپنے آبائی مقام

امگاؤں، ضلع گونڈیا میں 85 برس کی عمر میں انتقال کر گئے۔ ان کے انتقال سے ودربھ

کے سیاسی و سماجی حلقوں میں سوگ کی فضا پھیل گئی ہے۔

مہادیو

راؤ شیونکر نے اپنی سیاسی زندگی کا آغاز تدریس سے کیا۔ 7 اپریل 1940 کو امگاؤں میں

پیدا ہونے والے شیونکر نے معاشیات اور تاریخ میں اعلیٰ تعلیم حاصل کرنے کے بعد

بھاوبھوتی کالج میں لیکچرر کی حیثیت سے خدمات انجام دیں۔ بعد ازاں وہ سیاست کے میدان

میں آئے اور طویل عوامی خدمت کے سفر کا آغاز کیا۔

وہ 1978

سے 2004 تک مہاراشٹر اسمبلی کے لیے پانچ بار منتخب ہوئے اور 1999 سے 2004 تک ریاست

کے کابینہ میں وزیر خزانہ، آبپاشی اور منصوبہ بندی جیسے اہم محکمے سنبھالے۔ ان کے

دور میں گونڈیا ضلع کی تشکیل ایک تاریخی سنگِ میل ثابت ہوئی۔

سیاسی

خدمات کے ساتھ وہ ایک مصنف بھی تھے۔ ان کی کتابوں میں ’’گجااد‘‘، ’’ایمرجنسی دور کی

ڈائری‘‘ اور بھارت کی معیشت و زرعی مسائل پر متعدد تصانیف شامل ہیں۔ بی جے پی کے

ساتھ ساتھ مختلف سیاسی جماعتوں کے رہنماؤں نے ان کے انتقال پر دکھ کا اظہار کرتے

ہوئے کہا کہ شیونکر نے ودربھ کی ترقی کے لیے جو خدمات انجام دیں وہ ہمیشہ یاد رکھی

جائیں گی۔

آنجہانی

کی آخری رسومات 21 اکتوبر کو صبح 10 بجے امگاؤں کے سلیکسا روڈ پر واقع سکریٹولا

گھاٹ پر ادا کی جائیں گی۔ ان کے پسماندگان میں دو بیٹے، وجے شیونکر (سابق ضلع پریشد

چیئرمین) اور سنجے شیونکر شامل ہیں

ہندوستھان

سماچار

--------------------

ہندوستان سماچار / جاوید این اے