اسلام آباد، 14 اکتوبر (ہ س)۔ پاکستان نے افغانستان کی طالبان حکومت سے درخواست کی ہے کہ وہ اپنے دائرہ اختیار سے باہر کے معاملات پر تبصرہ کرنے سے گریز کرے اور واضح کیا ہے کہ اسے اپنے اندرونی معاملات میں بیرونی مشورے کی ضرورت نہیں ہے۔ یہ بات پاکستانی دفتر خارجہ کے ترجمان شفقت علی خان نے ایک بیان میں کہی۔ بیان کے مطابق، ہم نے پاکستان کے اندرونی معاملات کے حوالے سے طالبان حکومت کے ترجمان کے حالیہ بیانات کا نوٹس لیا ہے۔ بیان میں کہا گیا ہے کہ بین الاقوامی سفارتی اصولوں کے مطابق دوسرے ممالک کے معاملات میں عدم مداخلت کے اصول پر عمل کیا جانا چاہیے۔ پاکستان کو اپنے اندرونی معاملات میں بیرونی مشورے کی ضرورت نہیں۔

پاکستانی ترجمان نے کہا، ہم توقع کرتے ہیں کہ طالبان حکومت اپنی ذمہ داریوں اور دوحہ عمل کے دوران عالمی برادری سے کیے گئے وعدوں کی پاسداری کرے گی۔ انہوں نے مزید کہا کہ طالبان حکومت کو افغان سرزمین کو دوسرے ممالک کے خلاف دہشت گردی کے لیے استعمال کرنے کی اجازت نہیں دینی چاہیے۔ مزید برآں، اسے بے بنیاد پروپیگنڈے میں الجھنے کی بجائے ایک تعاون پر مبنی اور حقیقی معنوں میں نمائندہ حکومت بنانے پر توجہ دینی چاہیے۔

---------------

ہندوستان سماچار / عبدالسلام صدیقی