نئی دہلی، 8 ستمبر (ہ س)۔ مغربی ایشیا میں جاری کشیدگی اور بین الاقوامی بازار میں خام تیل کی قیمتوں میں مسلسل اضافے سے آج مسلسل دوسرے دن گھریلو شیئر بازار جھلس گیا۔ دنیا بھر کے شیئر بازاروں میں پیدا ہونے والی گھبراہٹ کا اثر ہندوستان میں بھی نظر آیا۔ اس کے نتیجے میں سینسیکس آج انٹرا ڈے میں 579.46 پوائنٹس تک ٹوٹ گیا۔ اسی طرح نفٹی نے بھی انٹرا ڈے میں 156.05 پوائنٹس تک غوطہ لگایا۔ پورے دن کی خرید و فروخت کے بعد سینسیکس 0.73 فیصد اور نفٹی 0.61 فیصد کی کمزوری کے ساتھ بند ہوئے۔ بازار میں آئی گراوٹ کی وجہ سے شیئر بازار کے سرمایہ کاروں کو آج تقریباً 1.47 لاکھ کروڑ روپے کا نقصان اٹھانا پڑا۔

بی ایس ای کا سینسیکس آج 162.53 پوائنٹس یعنی 0.21 فیصد کی گراوٹ کے ساتھ 75,970.28 پوائنٹس کی سطح پر کھلا۔ کاروبار شروع ہوتے ہی خریداری کی حمایت سے کچھ ہی دیر میں یہ انڈیکس 40 پوائنٹس سے زیادہ کی بہتری کے ساتھ 76,012.11 پوائنٹس کی سطح پر پہنچ گیا۔ اس کے بعد بازار میں فروخت کا دباؤ بن گیا، جس کی وجہ سے سینسیکس مسلسل گرتا چلا گیا۔ اگرچہ خریداروں نے درمیان میں کئی بار خریداری کا زور بنانے کی کوشش کی، لیکن عالمی سطح پر بنے منفی رجحانات کی وجہ سے فروخت کا دباؤ اتنا زیادہ تھا کہ خریداروں کی کوئی بھی کوشش کامیاب نہیں ہو سکی۔

شیئروں کی مسلسل فروخت کی وجہ سے آج کا کاروبار ختم ہونے سے کچھ دیر پہلے یہ انڈیکس 579.46 پوائنٹس یعنی 0.76 فیصد گر کر 75,553.35 پوائنٹس کی سطح تک پہنچ گیا۔ آخر میں انٹرا ڈے سیٹلمنٹ کی وجہ سے ہونے والی معمولی خریداری کی حمایت سے سینسیکس دن کی نچلی سطح سے معمولی بحالی کرتے ہوئے 555.23 پوائنٹس یعنی 0.73 فیصد کی کمزوری کے ساتھ 75,577.58 پوائنٹس کی سطح پر بند ہوا۔

سینسیکس کی طرح این ایس ای کے نفٹی نے بھی آج 36.05 پوائنٹس یعنی 0.15 فیصد کی گراوٹ کے ساتھ 23,743.10 پوائنٹس کی سطح سے کاروبار کا آغاز کیا۔ بازار کھلتے ہی خریداری کی حمایت ملنے سے یہ انڈیکس ابتدائی سطح سے تقریباً 15 پوائنٹس کی بحالی کے ساتھ 23,758.95 پوائنٹس کی سطح تک پہنچ گیا۔ اس کے بعد بازار میں مسلسل شیئروں کی فروخت ہونے لگی۔ فروخت کے دباؤ کی وجہ سے نفٹی کی رفتار کمزور ہوتی چلی گئی۔

مسلسل فروخت کی وجہ سے آج کا کاروبار ختم ہونے سے کچھ دیر پہلے یہ انڈیکس 156.05 پوائنٹس یعنی 0.66 فیصد گر کر 23,623.10 پوائنٹس کی سطح تک آ گیا۔ آخر میں دن کے سودوں کے تصفیے کی وجہ سے ہونے والی خریداری کی حمایت سے نفٹی نے نچلی سطح سے معمولی بحالی کی اور 144.05 پوائنٹس یعنی 0.61 فیصد کی گراوٹ کے ساتھ 23,635.10 پوائنٹس کی سطح پر بند ہوا۔

آج دن بھر کے کاروبار کے دوران بینکنگ، آئل اینڈ گیس، آئی ٹی، کنزیومر ڈیوَریبلز اور میٹل سیکٹر کے شیئروں میں زبردست فروخت ہوتی رہی۔ دوسری جانب کیپٹل گڈز، ہیلتھ کیئر اور میڈیا سیکٹر کے شیئروں میں مسلسل خریداری ہوتی رہی۔ اس کے علاوہ ایف ایم سی جی، پبلک سیکٹر انٹرپرائزز اور آٹوموبائل انڈیکس بھی مضبوطی کے ساتھ سبز نشان میں بند ہوئے۔ براڈَر مارکیٹ میں بھی آج مسلسل خریداری ہوتی رہی، جس کے باعث نفٹی کا مڈ کیپ انڈیکس 0.21 فیصد کی مضبوطی کے ساتھ بند ہوا۔ اسی طرح اسمال کیپ انڈیکس نے 0.17 فیصد کی تیزی کے ساتھ آج کے کاروبار کا اختتام کیا۔

آج شیئر بازار میں آئی گراوٹ کے باعث اسٹاک مارکیٹ کے سرمایہ کاروں کی دولت میں تقریباً ڈیڑھ لاکھ کروڑ روپے کی کمی آ گئی۔ بی ایس ای میں درج کمپنیوں کی مارکیٹ کیپٹلائزیشن آج کے کاروبار کے بعد گھٹ کر 486.25 لاکھ کروڑ روپے (عبوری) رہ گئی، جبکہ گزشتہ کاروباری دن یعنی پیر کو ان کی مارکیٹ کیپٹلائزیشن 487.72 لاکھ کروڑ روپے تھی۔ اس طرح سرمایہ کاروں کو آج کے کاروبار سے تقریباً 1.47 لاکھ کروڑ روپے کا نقصان ہوا۔

آج دن بھر کے کاروبار کے دوران بی ایس ای میں 4,609 شیئروں میں فعال کاروبار ہوا۔ ان میں 2,096 شیئر اضافے کے ساتھ بند ہوئے، جبکہ 2,291 شیئروں میں گراوٹ کا رجحان رہا اور 222 شیئر بغیر کسی اتار چڑھاؤ کے بند ہوئے۔ این ایس ای میں آج 3,256 شیئروں میں فعال کاروبار ہوا۔ ان میں سے 1,492 شیئر منافع کے ساتھ سبز نشان میں اور 1,764 شیئر نقصان کے ساتھ سرخ نشان میں بند ہوئے۔ اسی طرح سینسیکس میں شامل 30 شیئروں میں سے 9 شیئر اضافے کے ساتھ اور 21 شیئر گراوٹ کے ساتھ بند ہوئے۔ جبکہ نفٹی میں شامل 50 شیئروں میں سے 17 شیئر سبز نشان، 31 شیئر سرخ نشان اور دو شیئر بغیر کسی اتار چڑھاؤ کے بند ہوئے۔

ہندوستھان سماچار

---------------

ہندوستان سماچار / عبدالواحد