میلبورن، 8 ستمبر (ہ س)۔ کرکٹ آسٹریلیا (سی اے) نے بگ بیش لیگ (بی بی ایل) میں نجی سرمایہ کاری کو کھولنے کی طرف ایک بڑا قدم اٹھایا ہے۔ اس کے تحت میلبورن رینیگیڈز نجی سرمایہ کاروں سے بولیاں طلب کرنے والا پہلا کلب ہوگا۔ جیسا کہ منصوبہ بنایا گیا تھا، رینیگیڈز 2027تا2028 سیزن میں نئی ملکیت کے ساتھ میدان سنبھال سکتے ہیں۔

سی اے نجی سرمایہ کاروں سے رینیگیڈز کے لیے تجاویز طلب کرے گا۔ اس عمل کی کامیابی بگ بیش لیگ کے دیگر کلبوں کے لیے بھی نجی سرمایہ کاری کے دروازے کھول سکتی ہے۔ تاہم، مستقبل میں کسی بھی دوسرے کلب کی فروخت کا فیصلہ متعلقہ ریاستی ممبران اپنے کلب اور مقامی برادری کے مفادات کو مدنظر رکھتے ہوئے کریں گے۔

کرکٹ آسٹریلیا کے چیئرمین مائیک بیرڈ نے ایک سرکاری بیان میں کہا کہ کرکٹ آسٹریلیا اور اس کے ریاستی اراکین بگ بیش لیگ اور ویمنز بگ بیش لیگ میں سرمایہ کاری اور ترقی اور کرکٹ کی ہر سطح کے مفادات کو آگے بڑھانے کے لیے پرعزم ہیں۔ بگ بیش لیگ میں نجی سرمایہ کاری کی راہ کھول کر کرکٹ آسٹریلیا کھیل کے طویل مدتی مستقبل کو مضبوط اور محفوظ بنانے کی طرف ایک سوچی سمجھی قدم اٹھا رہا ہے۔

رینیگیڈز سیل کے عمل کا آغاز ہمارے اراکین کے لیے خود ارادیت کے ماڈل کا پہلا قدم ہے اور یہ آسٹریلوی کرکٹ کے لیے ایک اہم سنگ میل ہے۔

سی اے نے واضح کیا ہے کہ نجی سرمایہ کاری کی آمد کے باوجود اس کا اور اس کے ریاستی اراکین کا آسٹریلوی کرکٹ کے اہم امور پر کنٹرول برقرار رہے گا۔ ان میں بین الاقوامی شیڈول، کھلاڑیوں کی دستیابی، بگ بیش لیگ اور ویمنز بگ بیش لیگ کے لیے تنخواہ کی حد، برانڈنگ کی پیشکشیں، لائسنسوں کے لیے کم از کم مقررہ قیمتیں اور سرمایہ کاروں کی منظوری شامل ہیں۔

بیرڈ نے کہا، یہ ایک اہم فیصلہ ہے جو کئی مہینوں کا وسیع تجزیہ، بحث اور تعاون پرمشتملہے۔ میں اس عمل میں شامل تمام لوگوں کا شکریہ ادا کرنا چاہتا ہوں۔ ہمیں یقین ہے کہ یہ آسٹریلیا میں کرکٹ کے مستقبل کو محفوظ بنانے، بگ بیش کو مضبوط کرنے اور عالمی سطح پر اپنی پوزیشن برقرار رکھنے کا بہترین طریقہ ہے۔

میلبورن رینیگیڈز کی فروخت کو آسٹریلوی کرکٹ میں کلب کی ملکیت کے ڈھانچے میں ایک بڑی تبدیلی کے آغاز کے طور پر دیکھا جارہا ہے۔ یہ نجی سرمائے کے لیے بگ بیش لیگ میں داخل ہونے کی راہ ہموار کر سکتا ہے اور دیگر کلب مستقبل میں اسی ماڈل کی پیروی کر سکتے ہیں۔

ہندوستھان سماچار

---------------

ہندوستان سماچار / عبدالسلام صدیقی