نئی دہلی، 6 ستمبر (ہ س)۔

دہلی حکومت قومی دارالحکومت میں فضائی آلودگی کم کرنے اور ہوا کے معیار کو بہتر بنانے کے لیے مسلسل اور وسیع پیمانے پر اقدامات کر رہی ہے۔ ان کوششوں میں نفاذِ قانون، تکنیکی مداخلت، متعلقہ فریقوں کی شمولیت اور عوامی شرکت کو شامل کیا گیا ہے۔ اسی عزم کو آگے بڑھاتے ہوئے دہلی حکومت نے پورے شہر میں معلومات، تعلیم اور مواصلات پر مبنی ایک جامع بیداری مہم شروع کی ہے۔

دہلی کے ماحولیات کے وزیر منجندر سنگھ سرسا نے اتوار کو ایک بیان جاری کرتے ہوئے کہا کہ دہلی حکومت فضائی آلودگی کے چیلنج سے نمٹنے کے لیے پوری سنجیدگی اور تسلسل کے ساتھ کام کر رہی ہے۔ حکومت ہر سطح پر قانون کے نفاذ کو مضبوط کر رہی ہے اور وسیع پیمانے پر اقدامات نافذ کیے جا رہے ہیں۔ تاہم صاف ہوا کی جنگ صرف حکومت کی کوششوں سے نہیں جیتی جا سکتی۔ ہر شہری، ہر ادارے اور ہر متعلقہ فریق کا اس میں اہم کردار ہے۔

سرسا نے بتایا کہ دہلی آلودگی کنٹرول کمیٹی (ڈی پی سی سی) کے زیرِ انتظام یہ مہم ستمبر 2026 سے مارچ 2027 تک ساتھ نبھائیں، آلودگی گھٹائیں کے عنوان سے چلائی جائے گی۔ اس مہم کے ذریعے دہلی کے مختلف سرکاری محکموں، اداروں، صنعتوں، برادریوں اور شہریوں کو ایک پلیٹ فارم پر لاتے ہوئے صاف اور صحت مند ہوا کے لیے ایک مسلسل اور اجتماعی عوامی تحریک تیار کی جائے گی۔

اسی مقصد کے تحت یہ مہم ماحولیاتی بیداری کو محض معلومات تک محدود رکھنے کے بجائے اسے عملی اقدامات میں تبدیل کرنے پر زور دے گی۔ اس کے ذریعے شہریوں کو آلودگی کے مختلف ذرائع سے آگاہ کیا جائے گا اور انہیں ایسے آسان اور عملی اقدامات کے بارے میں بتایا جائے گا، جن کے ذریعے انفرادی اور اجتماعی کوششیں صاف ہوا کو یقینی بنانے میں اپنا کردار ادا کر سکتی ہیں۔

آنے والے مہینوں میں دہلی بھر میں بیداری، حساسیت پیدا کرنے اور متعلقہ فریقوں کی شرکت سے متعلق مختلف سرگرمیوں کا سلسلہ منعقد کیا جائے گا۔ اسکولوں اور کالجوں، صنعتوں، ریزیڈینٹ ویلفیئر ایسوسی ایشن (آر ڈبلیو اے)، بازاروں، تعمیراتی شعبے سے وابستہ افراد، بڑی مقدار میں فضلہ پیدا کرنے والوں، کسانوں، گاڑی مالکان اور عام شہریوں کو ہدف بنا کر ان سرگرمیوں کے ذریعے مہم سے جوڑا جائے گا۔

ہندوستھان سماچار

ہندوستان سماچار / عطاءاللہ