نئی دہلی، 25 ستمبر (ہ س): مرکزی حکومت نے جائیدادوں میں ڈیجیٹل کنیکٹیویٹی کو شفاف اور قابلِ پیمائش بنانے کی سمت میں ڈیجیٹل کنیکٹیویٹی ریٹنگ پلیٹ فارم شروع کیا ہے۔ ٹیلی کام ریگولیٹری اتھارٹی آف انڈیا (ٹی آر اے آئی) کی جانب سے شروع کیے گئے اس مربوط ڈیجیٹل پلیٹ فارم کے ذریعے صارفین کسی جائیداد کی ڈیجیٹل کنیکٹیویٹی ریٹنگ دیکھ سکیں گے اور جائیداد خریدنے یا کرائے پر لینے سے پہلے کنیکٹیویٹی سے متعلق معلومات کی بنیاد پر فیصلہ کر سکیں گے۔

مرکزی وزارت مواصلات کے مطابق، ٹی آر اے آئی نے جمعہ کو ڈیجیٹل کنیکٹیویٹی ریٹنگ (ڈی سی آر) پلیٹ فارم شروع کیا۔ یہ پلیٹ فارم جائیدادوں کی ڈیجیٹل کنیکٹیویٹی کی ریٹنگ کے پورے عمل کو ڈیجیٹل طریقے سے انجام دینے کے ساتھ صارفین کو ریٹنگ دیکھنے اور سرٹیفکیٹ کی صداقت کی جانچ کرنے کی سہولت فراہم کرتا ہے۔ اس کے ساتھ ڈیجیٹل کنیکٹیویٹی کی جانچ کے لیے موبائل ایپ بھی شروع کی گئی ہے۔

ڈی سی آر پلیٹ فارم ٹیلی کام ریگولیٹری اتھارٹی کی جانب سے 2024 میں جاری کیے گئے ’ڈیجیٹل کنیکٹیویٹی کے لیے جائیدادوں کی ریٹنگ ضوابط‘ اور مئی میں جاری کیے گئے اس کے ترمیم شدہ ضوابط کے تحت مقررہ عمل کو نافذ کرنے میں مدد کرے گا۔ ٹی آر اے آئی نے جون 2026 میں ریٹنگ مینوئل-2026 بھی جاری کیا تھا، جس میں ریٹنگ کا طریقۂ کار مقرر کیا گیا ہے۔

پلیٹ فارم پر صارفین کے لیے عوامی سہولت دستیاب ہوگی، جہاں وہ ڈیجیٹل کنیکٹیویٹی کے لیے ریٹنگ حاصل کرنے والی جائیدادوں کی معلومات دیکھ سکیں گے۔ جائیداد کے منتظم، رجسٹرڈ ڈیجیٹل کنیکٹیویٹی ریٹنگ ایجنسی اور صارف ایک ہی ڈیجیٹل پلیٹ فارم سے منسلک ہو سکیں گے۔

جائیداد کے منتظمین عوامی، سرکاری، تجارتی اور نجی جیسی کیٹیگریز میں اپنی جائیدادوں کا اندراج کر سکیں گے۔ وہ ریٹنگ کے لیے درخواست جمع کرانے، مقررہ معلومات اور دستاویزات اپ لوڈ کرنے، رجسٹرڈ ڈیجیٹل کنیکٹیویٹی ریٹنگ ایجنسی کا انتخاب کرنے اور درخواست کی صورت حال پر نظر رکھنے کے قابل ہوں گے۔ پلیٹ فارم تعمیر شدہ اور زیرِ تعمیر، دونوں طرح کی جائیدادوں کے جائزے کے مقررہ عمل کی معاونت کرے گا۔

رجسٹرڈ ڈیجیٹل کنیکٹیویٹی ریٹنگ ایجنسیاں انہیں تفویض کی گئی درخواستوں تک رسائی حاصل کر سکیں گی اور جائیدادوں کا جائزہ لے سکیں گی۔ وہ اپنے معائنے، جانچ کے نتائج اور دیگر متعلقہ معلومات درج کرنے کے ساتھ ضروری دستاویزات کا انتظام بھی کر سکیں گی۔ اس کے ذریعے جائزے، رپورٹ تیار کرنے، سرٹیفکیشن اور ریٹنگ شائع کرنے کا پورا عمل ڈیجیٹل طور پر مکمل کیا جا سکے گا۔

میدانی جائزے کے لیے ڈیجیٹل کنیکٹیویٹی ریٹنگ ایجنسیوں کے لیے خصوصی موبائل ایپ دستیاب کرائی گئی ہے۔ مجاز ایجنسیاں اس ایپ کے ذریعے مقررہ جانچ کے طریقۂ کار کے مطابق عمارت کے اندر ڈیجیٹل کنیکٹیویٹی کی پیمائش کر سکیں گی۔ ویب پورٹل پر دستیاب جائیداد سے متعلق معلومات اور موبائل ایپ سے جمع کیے گئے جائزے سے متعلق اعداد و شمار کو پلیٹ فارم پر باہم مربوط کیا جائے گا۔

پلیٹ فارم میں دستاویزات اور سرٹیفکیٹس کے ڈیجیٹل دستخط اور تصدیق کے لیے ای-سائن کی سہولت بھی شامل ہے۔ اس کے علاوہ مقررہ ریٹنگ فیس کی آن لائن ادائیگی، ای میل اور SMS الرٹس اور جائیدادوں کے ریکارڈ، جانچ کے نتائج، سرٹیفکیٹس اور آڈٹ ریکارڈ کو محفوظ رکھنے کی سہولت بھی دستیاب ہوگی۔

صارف جائیداد کے نام، سرٹیفکیٹ شناختی نمبر یا مقام کی بنیاد پر ریٹنگ حاصل کرنے والی جائیداد تلاش کر سکیں گے۔ وہ جائیداد کا ڈیجیٹل طور پر دستخط شدہ ریٹنگ سرٹیفکیٹ دیکھ سکیں گے اور سرٹیفکیٹ پر موجود کیو آر کوڈ کے ذریعے اس کی صداقت کی تصدیق بھی کر سکیں گے۔

ٹی آر اے آئی کے مطابق، اس سے کسی جائیداد کی ڈیجیٹل کنیکٹیویٹی ایک ایسی خصوصیت کے طور پر سامنے آئے گی جسے صارف دیکھ اور تصدیق کر سکے گا۔ اس سے صارفین کو گھر یا دفتر خریدنے یا کرائے پر لینے سے پہلے دستیاب ڈیجیٹل کنیکٹیویٹی کی معلومات مل سکیں گی۔ وہ مختلف جائیدادوں کی ریٹنگ کا موازنہ بھی کر سکیں گے۔

ٹی آر اے آئی کے چیئرمین انیل کمار لاہوٹی نے کہا کہ ڈیجیٹل کنیکٹیویٹی ریٹنگ پلیٹ فارم جائیدادوں کی ڈیجیٹل کنیکٹیویٹی کی تیاری کا جائزہ لینے کے لیے شفاف اور معیاری نظام قائم کرتا ہے۔ عوامی طور پر ریٹنگ تلاش کرنے اور سرٹیفکیٹس کی تصدیق کی سہولت سے صارفین کو قابلِ اعتماد اور قابلِ موازنہ معلومات ملیں گی۔

انہوں نے کہا کہ اس سے صارفین کو بہتر اور قابلِ اعتماد کنیکٹیویٹی والے گھروں اور دفاتر کے انتخاب میں مدد ملے گی۔ اس سے صارفین کو ایسی کنیکٹیویٹی کی معلومات بھی مل سکیں گی جو کال، ڈاؤن لوڈ اور آن لائن خدمات تک رسائی کو آسان بناتی ہے۔ ساتھ ہی جائیداد میں ڈیجیٹل کنیکٹیویٹی کے لیے تیار کیے گئے بنیادی ڈھانچے کی اہمیت کو سمجھنے اور جائیداد کے منتظمین کو ترقی کے مناسب مرحلے پر ایسے نظام کی منصوبہ بندی کرنے کے لیے ترغیب ملے گی۔

ڈی سی آر فریم ورک جائیدادوں کے اندر ڈیجیٹل کنیکٹیویٹی کی جانچ کے لیے معیاری طریقۂ کار فراہم کرتا ہے۔ اس میں فائبر کی تیاری، موبائل نیٹ ورک کی دستیابی، عمارت کے اندر کنیکٹیویٹی کے حل اور وائی فائی بنیادی ڈھانچے سے متعلق مقررہ معیارات شامل کیے گئے ہیں۔ جائیدادوں کی مختلف کیٹیگریز کے لیے الگ الگ معیارات لاگو ہوں گے۔

ٹی آر اے آئی کے مطابق، اس فریم ورک کا مقصد جائیداد کی ترقی کے مناسب مرحلے پر ڈیجیٹل کنیکٹیویٹی کے بنیادی ڈھانچے کو مدنظر رکھنے کی حوصلہ افزائی کرنا ہے۔ اس کے ساتھ موجودہ جائیدادوں میں دستیاب بنیادی ڈھانچے اور ڈیجیٹل کنیکٹیویٹی کی کارکردگی کا جائزہ لینے کا نظام فراہم کرنا بھی اس کا مقصد ہے۔

ہندوستھان سماچار

---------------

ہندوستان سماچار / عبدالسلام صدیقی